Хан-Уул дүүргийн Засаг даргын суудлаас парламентад заларсан Д.Загджав гишүүн МАХН-д элсэх гэнэ. Гэхдээ нэр дэвших гэж биш, гомдлоо тайлах гэж. Учир нь, энэ сарын 25-нд УИХ болоод НИТХ-д нэр дэвшүүлэх үйл ажиллагаа дуусгавар болжээ. Тийм болохоор одоо Д.Загджав гишүүнд нэр дэвших хугацаа байхгүй. Тэр зүгээр л МАН-ынханд гомдсон гомдлоо тайлах гэж ийнхүү МАХН-д элсэх гэнэ. Өөрөөр хэлбэл, экс андууддаа эргэж очно гэсэн үг. Эрхэм гишүүн Д.Загджав хэдхэн хоногийн өмнө ХЗДХ-ийн сайд Ц.Нямдоржийг огцруулахаар гүйснийхээ хариуг амсч, ийнхүү МАН-аас нэр дэвшиж чадсангүй гэх нэгэн ч байна. Харин тэрээр “Би намаа шүүмжлээгүй, зөвхөн Ц.Нямдоржийг л огцруулах ёстой гэж санал гаргасан” гэж тайлбарладаг. Тэрээр ХЗДХ-ийн сайдыг огцруулах тухай хөндөж, Н.Энхбаярыг өмөөрч өмгөөлж явсан. Бүлгийн хурлын үеэр хүртэл “Нямдорж оо, чи Н.Энхбаярыг бариулсан” хэмээн том дуугарч, дараа нь Төрийн байгуулалтын байнгын хорооны хурал дээр ч ганцаараа Ц.Нямдоржийг огцруулахаар зүтгэсэн. Харамсалтай нь, тэр дийлээгүй. Энэ шуугианы араас удалгүй Д.Тэрбишдагва, Ч.Улаан, О.Чулуунбат нар МАХН-д элсэн дор бүрнээ даргын суудалд заларсан Р.Раш, Д.Загджав нарыг МАН-ын удирдлагуудаас тойрог авахаар тохиролцоод тэмцлээсээ татгалзсан хэмээн яриа дэгдсэн. Гэвч тойрог авч чадаагүйгээс үзвэл тэд тохироо хийж чадаагүй бололтой. Эсвэл намынхаа дарга нарын өөдөөс хэдэрлэсэн болохоор хариуг нь барьж байгаа нь энэ бололтой. МАН нэр дэвшигчдээ тодруулж, эрхэм гишүүн Д.Загджав тоглоомын гадна үлдсэн учир түүнд одоо гомдлоо тайлж МАХН-д элсэх л үлдлээ.