Увс аймгийн АН-ын дарга Д.Цэндсүрэн, АН-ын ҮЗХ-ны гишүүн Д.Нямхүү, Увс аймгийн Бөхмөрөн сумын Засаг дарга Д.Ядамжав нар дараахь мэдээллийг өгөхөөр хэвлэлийн бага хурал зарлалаа. Тэд энэ үеэр Увс аймгийн Бөхмөрөн сум дахь нүүрсний бүлэг ордыг стратегийн ордод хамруулах хүсэлтийг Үндэсний аюулгүй байдлын зөвлөлд тавьж буйгаа дуулгасан юм. Үндэсний аюулгүй байдлын зөвлөлөөс зөвлөмж гаргачихвал асуудал амархан шийдэгдэх учиртай гэнэ. Увс аймгийн Бөхмөрөн сумын иргэд УИХ-ын 2007 оны 27 дугаар тогтоолыг биелүүлэхийг Засгийн газраас шаардаж, 17 мянган хүн гарын үсгээ зуржээ. Учир нь, тус сумд 300 сая тоннын нөөцтэй нүүрсний орд байдаг. Энэ ордыг улсын төсвийн хөрөнгөөр хайгуул хийж илрүүлсэн юм билээ. Гэтэл энэ ордыг УИХ-ын гишүүн Ч.Хүрэлбаатар гадаадын компаниудад худалдсан хэмээн тэд үзэж байгаа аж.  Бөхмөрөн сумд ашиглалтын долоо, хайгуулын есөн тусгай зөвшөөрөл олгогдсон байна. Үүний ихэнхийг нь Канадын “Си Жи Би И Эм”, Солонгосын төрийн өмчийн “Кореа Коал”, Хятадын “Ментау”, Бразилийн “Тефис майнинг” компани эзэмшдэг гэлээ. Хэдийгээр тэд Монгол Улсын хуулийн хүрээнд лиценз авсан гэдэг боловч Солонгосын төрийн өмчит “Кореа Коал” компани нь Хотгор шанагын уурхайн 51 хувийг эзэмшиж байгааг хэлэв. Ийнхүү Монгол Улсын баруун бүсийн эрчим хүчний бодлого солонгосчуудын мэдэлд ороход ойрхон болоод буйг анхааруулж байгаа гэж байлаа.