Монгол Улсын анхны Ерөнхийлөгч П.Очирбатыг төрийн албанаас буухдаа  улсаас өгсөн байшингаа худалджээ. Худалдаж авсан компани нь MCS групп юм байна. Нэгэнт худалдаж авсан эзэн нь юм хойно яахаа өөрсдөө мэдсэн бололтой. Тэд байшинг  нурааж оронд нь барилга барихаар газрыг засч, янзалж байна.  Хотын төвд байх энэхүү газрыг олж авахын тулд ч багагүй мөнгө төлж авсан гэнэ. Цагтаа бас л хэл ам дагуулан ядруухан төсөвтэй хэрнээ хотын төвд гэж хүртэл эрхэм экс Ерөнхийлөгч захиалан байж авсан байшин. Гэтэл одоо газарт ороод иймэрхүү л янзтай болчихоод байгаа юм. Жиргээчдийн өглөөний сэдэв энэ байшин, газар байлаа. УИХ-ын гишүүн С.Ламбаа, Х.Баттулга нар энэ талаар хөндөж ярилцжээ. С.Ламбаа “Төрд буцааж өгөөд Ерөнхийлөгч нарын түүхийн музей болгочихгүй дээ” гэж харамссан байна. Харин Х.Баттулга гишүүн “Хүн эцэг, эхээс үлдсэн гээд юмаа зардаггүй ш дээ. Сонин л юм. Бүр хотын төвд гэж ирээд л УИХ-аар тогтоол гаргаж байж билээ” гэж халаглав.