Ерөнхийлөгчийн Тамгын газраас “Иргэний танхим”-д сумын нийтийн зар мэдээний үлгэрчилсэн журмын төслийг өнөөдөр нээлттэй хэлэлцүүлжээ. Журмын төслийг Ерөнхийлөгчийн зөвлөх С.Оюунгэрэл танилцуулж, иргэд, төрийн болон төрийн бус байгууллагын төлөөлөл саналаа хэлэв.
С.Оюунгэрэл “Эрх мэдэл, мэдээлэлтэй хүнд баялаг очдог, мэдээлэлгүй хүн түүнээс хоцордог юм. Ашигт малтмалын лицензээр жишээлэхэд өвөлжөө, малын бэлчээр нь аль хэдийнэ нэг компанийн мэдэлд оччихсон байхад малчин нь мэдээгүй л байдаг. Энэ нь тодорхой нэг хэсэг хүн мэдээлэлд ойр ажилладгаа ашиглаад лицензийг нь авчихсан, харин мэдээлэлгүй малчин огт сонсоогүй явж байна гэсэн үг. Ийм замаар явсаар баян, хоосны ялгаа их, нийгэм тогтворгүй болчихсон байна. Тиймээс баян, ядуугийн ялгааг багасгах, нийгмээ тогтвортой байлгах үүднээс бид иргэдээ мэдээлэлжүүлэх зорилгоор энэ журамд ач холбогдол өгч байгаа юм” гэв.
Харин оролцогчид хагас сар бүр сумын мэдээллийн товхимол гаргаж, орон тооны бус гэрээт ажилтан шуудангаар зөөнө гэж төсөлд тусгасан нь эргээд хариуцлага тооцох боломжгүй. Сургууль, цэцэрлэгийн хүүхдүүд, идэвхтэн хүмүүсийг энэ ажилд оролцуулах ёстой. Нийтийн зар мэдээг хандивын мөнгөөр түгээж болохгүй. Сангийн яам сумын төсөвт тусгах нь зүйтэй хэмээв. Хэлэлцүүлэгт иргэд, төрийн бус байгууллагуудаас гадна Төв, Говьсүмбэр аймгийн нутгийн захиргааны төлөөлөл ирж оролцжээ.