Сүхбаатар дүүргийн шүүх өчигдөр Ганц худагийн урьдчилан хорих төвд “долдугаар сарын 1”-ний хэрэгт холбогдсон цагдаагийн экс дарга нарт холбогдох хэргийг хэлэлцэж чадалгүй зургаа дахь удаагаа хойшлууллаа. Шүүгдэгч ЦЕГ-ын даргын үүрэг гүйцэтгэгч асан, хошууч генерал Ч.Амарболд, НЦГ-ын дарга асан, хурандаа О.Зоригт нарын бие муу хэвтрийн дэглэм сахиж эмчлүүлэх шаардлагатай, өмгөөлөгч нар нь хавтаст хэрэгтэй бүрэн танилцаагүй нь шүүх хурал хойшлох шалтгаан болов.

Уг нь, тус дүүргийн шүүхийнхэн цагдаагийн экс дарга нарт холбогдох хэргийг хэлэлцэхээр Клиникийн нэгдсэн гуравдугаар эмнэлэгт эмчлүүлж байсан шүүгдэгч Ч.Амарболд, О.Зоригт нарыг албадан шүүх хуралд оролцуулахаар авчруулсан юм. Ч.Амарболд уржигдар элэгний хагалгаанд орсон бол О.Зоригт хэд хоногийн өмнө зүрхэндээ хагалгаа хийлгэсэн гэнэ. Тэднийг эмчлэх эмч “Хагалгаанд ороод удаагүй байгаа. Биеийн байдал нь тааруу, хэвтрийн дэглэм сахиж эмчлүүлэх шаардлагатай” гэсэн дүгнэлтийг шүүгчдэд өгсөн. Гэвч шүүхийнхэн үүнийг хэрэгсэхгүй, тэдний амь нас, эрүүл мэндэд ямар нэг эрсдэл учирвал бид хариуцна хэмээн шүүх хурлаа хийхээр гүрийв. Ингээд тэднийг Ганц худагийн урьдчилан хорих төвд аваачсан боловч шүүхийн танхимд оруулахгүйгээр шүүх хурлаа дээрх шалтгаанаар хойшлуулсан байна. Дараагийн шүүх хурлыг ирэх сарын 6-нд хийхээр дахин товлолоо.