Баянзүрх дүүргийн шүүхээс өнөөдөр Улсын харцага Г.Намсрайжавт замын цагдаагийн ажилтныг зодож, танхайрсан гэж буруутгаж, гурван жил, нэг сар хорих ял оноолоо.
Шүүх эл ялыг биеэр нь эдлүүлэхээр шийвдэрлэж, түүнд зодуулсан замын цагдаагийн ажилтны эмчилгээний зардлыг гаргуулахаар болов.
Тэрээр өнгөрсөн гуравдугаар сарын 28-нд Баянзүрх дүүргийн нутаг дэвсгэрт байрлах Нарантуул захын баруун урд уулзварын орчим албан үүргээ гүйцэтгэж, шаардлага тавьсан замын цагдаагийн ажилтныг зодож гэмтээсэн. Тухайн үед Г.Намсрайжавын хүү Замын хөдөлгөөны дүрэм зөрчиж, нэг чигийн урсгалтай зам дээр буцаж эргэхийг завдахад нь замын цагдаа дүрэм зөрчихгүй чигээрээ явахыг сануулж, бичиг баримтаа шалгуулах шаардлага тавьжээ. Гэтэл Г.Намсрайжав тус цагдаагийн биед халдаж, зодож танхайрсан нь Замын хөдөлгөөнийг хянах камерт бичигдэн үлдсэн юм.