УИХ-ын гишүүн, Аж үйлдвэрийн сайд Д.Эрдэнэбат “Оюу толгой” ХК-ийн ерөнхийлөгч бөгөөд гүйцэтгэх ерөнхий захирал Эндрью Вүдлэйг өчигдөр хүлээн авч уулзав.  Эндрью Вүдлэй  уулзалтын эхэнд Аж үйлдвэрийн сайд Д.Эрдэнэбат цаг зав гарган хүлээн авч буйд талархаад, дэлхийн зах зээлд түүхий эдийн үнэ буурч байгаа ч дунд хугацаандаа өсөн  нэмэгдэх боломж бий хэмээн үзэж буйгаа илэрхийлсэн юм. Түүнчлэн “Оюу толгой” ХК-ийн өнгөрсөн оны бараа бүтээгдэхүүний худалдан авалтын 50 хувийг  үндэсний үйлдвэрүүд бүрдүүлсэн аж. Тиймээс цаашдаа энэ хувь хэмжээг нэмэгдүүлэх боломжтойг тэрбээр онцоллоо.

Аж үйлдвэрийн сайд Д.Эрдэнэбат дотоодын үйлдвэрлэлийн нийлүүлэлтийг 50 хувь  тогтмол найдвартай байлгах, орон нутгийн үйлдвэрлэлийг дэмжих, хадгалах ажлыг зөв зохион байгуулах, кластер хэлбэрээр хэрэгжүүлэх ажлыг санаачлах шаардлага байгааг хэлэв. Ингэснээр бараа бүтээгдэхүүний чанар болоод үнийн тогтвортой байдал,  ажлын байрыг нэмэгдүүлэхэд эерэг нөлөө үзүүлнэ гэж үзэж байгаа юм. Үүнээс гадна Аж үйлдвэрийн яам Төрөөс аж үйлдвэрийн салбарт баримтлах бодлогын баримт бичгийг боловсруулж дуусаад УИХ-ын хэлэлцүүлгийн шатанд явааг дурдаад хүнд үйлдвэрийн хөгжлийн асуудлыг хэрхэн шийдэх талаар тусгасаныг хэлэв. Аж үйлдвэрийн салбарын хувьд нэн түрүүнд зэс хайлуулах үйлдвэрийг байгуулах шаардлага байгаа гэлээ.

Энэхүү уулзалтын төгсгөлд Эндрью Вүдлэй Зэс хайлуулах үйлдвэрийг барих  санаачилгыг дэмжиж буй учир судалж үзэхээ илэрхийллээ.