Нийслэлийн “Зорчигч тээврийн нэгтгэл” орон нутгийн өмчит, аж ахуйн тооцоот үйлдвэрийн газрын “Автобус-1,2,3” баазын ажилчид өнөөдөр ажил хаялт зарлахаа мэдэгдлээ. Тэд “Автобус-1” компанийн байранд ажил хаялт зарлах бөгөөд цалингийн урамшуулалтай холбоотой асуудлаар компанийн удирдлагуудтай тохиролцоонд хүрэхээр эрмэлзэж байгаа нь энэ юм байна.
Тухайлбал, “Зорчигч тээврийн нэгтгэл” нь жолооч, мөнгө хураагч нартай Тарифын хэлэлцээрийг байгуулсан бөгөөд энэхүү хэлэлцээрт “ажилчдын цалингийн 70 хувь нь үндсэн, 30 хувь нь шагнал цалин байх ёстой” талаар заасан байдаг гэнэ. Гэсэн ч өнөөдрийн байдлаар цалингийн 40 хувь нь үндсэн, 60 хувь нь шагналт цалин гэсэн харьцаатай байгаа аж. Өөрөөр хэлбэл, орлогын төлөвлөгөө биелээгүй бол шагналт цалин буюу нийт цалингийн 60 хувийг авч чадахгүйд хүрээд байгаа юм байна. Тиймээс норм биелэлтэд хамаарагдах хувийг 60 бус 30 хувь хүртэл буруулах шаардлага тавьж, хэлэлцээрээ мөрдөхийг сануулах юм байна. Харин ажил хаялт ямар хугацаанд үргэлжлэх талаар тодорхой мэдээлэл өгсөнгүй.