Засгийн газрын ээлжит хуралдаан даваа гарагийн 16 цагаас болдог. Гэхдээ хурлын дараа мэдээллээ өгдөггүй. Дараа өдөр нь албан ёсоор мэдээллээ түгээдэг. Тэгвэл өчигдөр цахим сайтууд болон олон нийтийн сүлжээгээр зуны цагийн хуваарьт шилжүүлэхээр шийдсэн тухай мэдээлэл гарав. Ерөнхий сайдын зөвлөх, хэвлэлийн төлөөлөгч Ц.Мөнхтөр твиттер хуудастаа “Засгийн газрын хуралдаанаас зуны цагийн тоололд энэ сарын 27-28-ны шөнө шилжих шийдвэр гаргалаа” хэмээн бичсэн тул энэ мэдээллийг баталгаажууллаа.
Цагийн хуваарийг хүйтэн болон дулааны улиралд өөрчилдөг байсныг 2007 он хүртэл манай улс мөрдөж байсан юм. Гэвч зарим шүүмжлэлээс болоод 2007 онд цагийн хуваарийг өөрчлөхөө болиод байсныг ийнхүү сэргээхээр шийдвэрлэжээ. Цагийн хуваарийг өөрчлөх нь хүний эрүүл мэнд, амьдралын хэвшилд зарим талаараа сөрөг нөлөө үзүүлдэг гэж үздэг ч уг шийдвэрийг ямар үндэслэлээр гаргасныг өнөөдөр тайлбарлана.