Өнөөдөр буюу дөрөвдүгээр сарын 6-ны өдөр нутгийн зүүн хэсгээр хур тандас үргэлжлэн орно гэж Ус цаг уур орчны шинжилгээний хүрээлэнгээс мэдээллээ. Тиймээс  зуны буюу хээ муутай дугуйтай автомашинаар хөдөлгөөнд оролцохгүй байх, хурдаа тохируулж явахыг Замын цагдаагийн газар анхааруулж байна. Өнгөрсөн амралтын өдрүүдэд цаг агаарын нөхцөл байдлаас шалтгаалан Өвөрхангай аймгийн Шартын даваа, Хэнтий аймаг, Багануур дүүргийн чиглэлийн зам, Архангайн салдаг уулзвараас баруун аймгууд руу зорчих чиглэлийн хөдөлгөөнийг хаасан ч өчигдөр өглөөний 07.30 цагт хөдөлгөөнийг нээсэн.

Гэхдээ Баруунтурууны даваа, 61-н гарам, Хайртханы даваа, цаашлаад 45 км дэх цэг хүртэл замын гадаргуу мөстсөн, хальтиргаа гулгаа ихтэй байна. Мөн Баруунтурууны даваа мөстсөний улмаас зарим нэг автомашинууд даваагаа давж чадахгүй зам хаах тохиолдол гарч байгааг Онцгой байдлын газраас сэрэмжлүүллээ. Тиймээс иргэд тээвэрчдийг согтуугаар болон зуны дугуйтай орон нутагт зорчихгүй байж, хөдөө орон нутаг руу зорчих шаардлагатай бол автомашины бүрэн бүтэн байдлаа шалгаж, хурдаа тохируулан анхаарал болгоомжтой явахыг сэрэмжлүүлж байна.

Мөн зарим голуудын усны түвшин нэмэгдэн нэмэгдэн эргээсээ хальж замын зорчих хэсэгт шавар шалбааг их тогтсон байгаа тул жолооч нар баталгаатай зам, гүүр, гарам, гарцаар зорчих, тээврийн хэрэгслийн найдвартай байдлыг хангаж, бензин, шатахууны нөөцтэй, дулаан хувцаслахыг сануулж байна. Түүнчлэн нойтон цас их хэмжээгээр орсон тохиолдолд цахилгаан дамжуулах агаарын шугамд саатал гардаг тул холбогдох гамшгаас хамгаалах алба, мэргэжлийн байгууллагуудын гамшгаас хамгаалах алба, мэргэжлийн байгууллагуудын гамшгаас хамгаалах бэлтгэл бэлэн байдлаа хангахыг Аймаг, нийслэлийн Онцгой байдлын газрын дарга нарт Онцгой байдлын газрын дарга, Хурандаа Б.Мандахгэрэл үүрэг болгосон байна.