Сүхбаатар дүүргийн шүүх МАХН-ын дарга, Ерөнхийлөгч асан Н.Энхбаяр нарт холбогдох хэргийг өнөөдөр 10:00 цагаас хэлэлцэнэ. Тус дүүргийн шүүх тэдэнд холбогдох хэргийг арав хоногийн өмнө хэлэлцэхээр товлосон боловч шүүгдэгч Н.Энхбаярын биеийн байдал муу байсан учир шүүх хурлыг өнөөдрийг болтол хойшлуулсан юм. Түүнчлэн шүүгдэгч Н.Энхбаяр өөрөө шүүх хуралд өөрөө оролцож, тайлбараа хэлнэ. Хамгийн гол нь, шүүх хурлыг олон нийтэд нээлттэй хийж өгөхийг шүүх бүрэлдэхүүнээс хүссэн билээ.

Харин өмнөх шүүх хуралд түүний өмгөөлөгчид Н.Энхбаярын бие тэнхэрч, сайжиртал хэргийг түдгэлзүүлж өгөхийг хүссэн боловч шүүх бүрэлдэхүүн тэдний эл саналыг хүлээж авахаас татгалзсан. Н.Энхбаяр хэлсэндээ хүрвэл өнөөдрийн шүүх хуралд өөрийн биеэр оролцох учиртай. Түүнийг бусадтай бүлэглэн долоон тэрбум орчим төгрөгийн хохирол учруулсан гэж хэд хэдэн хэрэгт буруутгаж байгаа.   
Нийслэлийн прокурорын газар болон Сүхбаатар дүүргийн шүүхээс шүүх ажиллагаа эхэлсэн учраас Н.Энхбаярыг нэр дэвшигчээр бүртгэхгүй байхыг хүссэн албан бичгээ Сонгуулийн ерөнхий хороонд хүргүүлсэн гэнэ. Тиймээс СЕХ-ныхон хуралдаад түүнийг бүртгэх эсэхээ түр хугацаагаар хойшлуулсан шийдвэр гаргасан тухай мэдээлэл ч байна.