УИХ-ын хэд хэдэн гишүүн хөрөнгө, орлогын мэдүүлгээ худал мэдүүлсэн учир АТГ-аас тэднийг УИХ-ын Ёс зүйн хороонд ховлосон билээ. Энэ дагуу гишүүд эхнээсээ хөрөнгө, орлогын мэдүүлэгтээ тайлбар хийж, буруу, худал мэдүүлснээ залруулж эхэлсэн байна. Тухайлбал, УИХ-ын гишүүн С.Оюун өнгөрсөн оны хөрөнгө, орлогын мэдүүлэгтээ нөхөр Ч.Энхбаярын 61,88 хувь эзэмшдэг “Амиада” компанийн хувьцааг мэдүүлээгүй байна. Тиймээс УИХ-ын Ёс зүйн хорооноос үүнд тайлбар хүссэн аж. Тэрээр тус хороонд өгсөн тайлбартаа “Миний нөхөр Ч.Энхбаяр энэ оны хоёрдугаар сарын 7-нд “Амида” компанийн 61,88 хувийн хувьцааныхаа 32 хувийн эзэмших эрхийг тус компанийн хувьцаа эзэмшигч Б.Гансүхэд шилжүүлсэн. Энэ өөрчлөлтийг хоёрдугаар сарын 8-нд Хуулийн этгээдийн бүртгэлийн газарт бүртгүүлсэн. Хувьцааны эзэмшлийн хувь хэмжээнд гарсан өөрчлөлтийг би хөрөнгө, орлогын мэдүүлэгтээ үнэн зөв тусгасан боловч хуульд заасанчлан 2011 оны арванхоёрдугаар сарын 31-ний өдрөөр тасалбар болголгүй 2012 оны хөрөнгө, орлогын мэдүүлэгт тусгагдах ёстой өөрчлөлтийг урьдчилан мэдүүлснээр зөрчилтэй мэт харагдахаар болжээ” гэжээ.