УИХ-ын гишүүн С.Оюун өөрийг нь илтэд гүтгэн гүжирдэж бичсэн хэмээн “Chuhal.mn” сайтыг шалгуулахаар Сүхбаатар дүүргийн цагдаагийн хэлтэст гомдол гаргасан байна.  
Тэрээр гомдолдоо “2012 оны тавдугаар сарын 30-ны өдөр “Chuhal.mn” сайтад  ”УИХ-ын гишүүн С.Оюун "Рио Тинто"-гийн тагнуулч уу?” гэсэн гарчигтай мэдээлэл нийтлэгдсэн нь УИХ-ын гишүүн, ИЗНН-ын дарга С.Оюун намайг  Монгол Улсын Эрүүгийн хуульд заасан “Эх орноосоо урвах” онц хүнд гэмт хэрэгт эрээ цээргүй гүтгэн гүжирдлээ гэж үзэж,  гомдол гаргаж байна. Энэхүү сайт нь  “... Монгол Улсын УИХ-д гадаадын тагнуулч байдаг гэнэ..., Энэ хүнийг  УИХ-ын гишүүн, ИЗНН-ын дарга С.Оюун гэж хардаж байгааг энэ дашрамд дуулгачихъя. Ямартай ч, С.Оюун ингэж хардуулах бүрэн үндэслэлтэй хүн юм байна” гэх мэтээр онц хүнд гэмт хэрэгт холбогдуулан гүтгэж, миний нэр хүндэд хэтэрхий бүдүүлэг, бурангуй байдлаар халдсаныг  нь тэвчин өнгөрөх аргагүй гэж үзэж байна. Иймд миний нэр хүндэд бүдүүлгээр халдаж, намайг онц хүнд гэмт хэрэгт гүтгэсэн гүжирдлэгийг олон нийтэд тараасан “Chuhal.mn” сайтын  эрх бүхий хүмүүст хуулийн дагуу хариуцлага тооцож өгнө үү” гэжээ.
 Мөн тэрээр тус сайтын эрхлэгчид бусдыг илтэд гүжирдсэн нийтлэлийнх нь төлөө цагдаагийн байгууллагад хандсан тухайгаа мэдэгдсэн байна.