АТГ-аас УИХ-ын хэд хэдэн гишүүнийг хөрөнгө, орлогын мэдүүлгээ дутуу, худал мэдээлсэн хэмээн буруутгаж, УИХ-ын Ёс зүйн дэд хороонд хандаад буй. Өмнө нь тус хороонд УИХ-ын гишүүн С.Оюун хөрөнгө, орлогынхоо мэдүүлэгт гарсан зөрчлийн тухай тайлбар өгсөн бол энэ удаа УИХ-ын гишүүн Л.Гүндалай өнгөрсөн оны хөрөнгө, орлогоо тайлбарласан байна.
Тэрээр тайлбартаа “УИХ-ын Ёс зүйн дэд хороонд АТГ-аас тавдугаар сарын 29-нд ирүүлсэн албан бичигт дурдсан нэр бүхий компаниуд нь ямарваа нэгэн үйл ажиллагаа явуулдаггүй, орлого, ашиг олдоггүй, нэг ч удаа хувьцаа гаргаагүй, ногдол ашиг хуваарилаагүй, санхүү, татварын байгууллагад “Х” тайлан гаргаж өгсөөр ирсэн тул ерөнхийдөө “мартагдсан” компаниуд юм. УИХ-ын 2007 оны 09 дүгээр тогтоолын нэгдүгээр хавсралтаар баталсан “ХОМ-ийн маягтыг бөглөх зааварчилгаа”-нд ийм компанийг мэдүүлэгт хэрхэн тусгах талаар тодорхой тусгаагүй болно. Нийслэлийн Засаг даргын 2010 оны 663 тоот захирамжаар Хан-Уул дүүргийн 11 дүгээр хороо, Зайсан дахь амины орон сууцны газар нь төрийн өмч юм.  АТГ миний 2010, 2011 оны хөрөнгө орлогын мэдүүлгийг цаг тухай бүрт нь хүлээж авсан атлаа зөрүүтэй мэдүүлсэн гэж УИХ-ын сонгуулийн сурталчилгаа эхлэхээс өмнөхөн 2012 оны тавдугаар сарын 29-нд УИХ-ын Ёс зүйн дэд хороонд гомдол ирүүлсэнд нэг талаар гайхаж байгаа боловч энэхүү тайлбарыг өгч байна” гэжээ.