Чингэлтэй дүүргийн шүүх өчигдөр “Эрдэнэ суварга” компанийн захирал Б.Сувдаагийн гарын үсгийг дуурайлган зурж, ХААН банкнаас 30 сая төгрөг зээлж залилсан хэрэгт буруутгаж байсан тус компанийн нягтлан Д.Энхмандахад холбогдох хэргийг хэлэлцсэн. Тус дүүргийн шүүх эл хэргийг бүтэн өдрийн турш хэлэлцсэний эцэст түүнийг цагаатгах шийдвэр гаргалаа.
“Эрдэнэ суварга” компани бол НИТХ-ын тэргүүлэгч Д.Бат-Эрдэнийх. Харин эхнэр Б.Сувдаа нь захирлаар нь ажилладаг. Тэд нягтлан Д.Энхмандахыг 30 сая төгрөг залилсан, 15 сая төгрөгийн үнэтэй машиныг нь бусдад борлуулж, мөнгийг нь завшсан зэрэг хэрэгт буруутгаж, хууль хяналтын байгууллагад дөрвөн жилийн өмнө хандсан байдаг. Д.Энхмандах “Намайг хилс хэрэгт гүтгэж байна. Би ямар ч буруу зүйл хийгээгүй” хэмээн мэдэгдэл хийж, компанийнхаа удирдлагуудын хууль бус үйлдлийг олон нийтэд илчилсэн удаатай. АТГ-т шалгуулахаар Д.Бат-Эрдэнийн бусдад авлига өгсөн хэргүүдийг ч сөхсөн. Гэвч тус газрынхан түүнийг шалгасан эсэх нь одоо хүртэл тодорхойгүй л байгаа юм.