Сүхбаатар дүүргийн шүүх ЦЕГ-ын даргын үүрэг гүйцэтгэгч асан, хошууч генерал Ч.Амарболд, НЦГ-ын дарга, хурандаа  О.Зоригт, тус газрын Хэв журмын хэлтсийн дарга асан, дэд хурандаа Г.Ганбаатар, ЭХГ-ын дарга, хурандаа Ш.Батсүх нарт холбогдох хэргийг өчигдөр 10:40 цагаас Ганц худагийн урьдчилан хорих төвд хэлэлцэж эхэлсэн. Шүүх хурал бүтэн өдрийн турш үргэлжилж, орой 23:00 цагт дуусчээ. Гэхдээ цагдаагийн экс дарга нарт холбогдох “долдугаар сарын 1”-ний гэх хэргийг эцэслэн шийдвэрлэж чадаагүй, улсын яллагч Е.Сагсай шүүгдэгч нарт ялын дүгнэлт сонсгосоноор дууссан байна. Тэрээр шүүгдэгчдийг  Эрүүгийн хуулийн 294.2-т зааснаар ”Захирагч эрх мэдэл албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс төрд онц их хэмжээний хохирол учруулсан” хэмээн үзэж Ч.Амарболдод ес, О.Зоригт, Ш.Батсүх, Г.Ганбаатар нарт найман жилийн хорих ялыг чанга дэглэмтэй хорих ангид эдлүүлэх нь зүйтэй хэмээн үзэж буйгаа танилцуулжээ. Шүүх хурал өнөөдөр үргэлжилнэ.