Сүхбаатар дүүргийн шүүх цагдаагийн экс дарга нарт холбогдох хэргийг хоёр өдрийн турш хэлэлцэж, өчигдөр орой 22:20 цагийн үед шийдвэрээ гаргалаа. Шүүхийн шийдвэрийг сонсгох үед ЦЕГ-ын үүрэг гүйцэтгэгч асан, хошууч генерал Ч.Амарболд, НЦГ-ын дарга асан хурандаа О.Зоригт, тус газрын Хэв журмын хэлтсийн дарга, дэд хурандаа Г.Ганбаатар, ЭХГ-ын дарга асан, хурандаа Ш.Батсүх нарын ар гэрийнхнээс нэг нэг төлөөлөл оролцуулсан. Бусад ШШГЕГ-ын харьяа урьдчилан хорих 461 дүгээр хорих ангийн гадаа үлдсэн юм. Хэвлэлийнхнийг шүүхийн шийдвэр сонсохоор хорих анги руу нэвтэрсэн хойно шүүхийн шийдвэрийг сонссон дарга нарын эхнэрүүд хоорондоо зодолдсон ажээ. Учир нь, шүүхээс Ч.Амарболд, Ш.Батсүх нарт гурван жил зургаан сар, О.Зоригтод хоёр жил зургаан сар хорих ял оноосон. Харин Г.Ганбаатарт хоёр жил хорих ял оноосон боловч өршөөлд хамруулсан юм. Эл шийдвэр цагдаагийн ар гэрийнхэнд хүнд тусч, яахаараа залуу дарга нар бага ялтай өнгөрч, өршөөгддөг юм гэсэн эхнэрүүд нь хоорондоо зодолдох шалтгаан болсон гэдгийг ч эх сурвалж хэлэв. Тэднийг хэвлэлийнхний хараанд өртүүлэхгүйн тулд 461 дүгээр хорих ангийг хамгаалалтад авсан цагдаагийн ажилтнууд зодооныг нь таслан зогсоон байна.