“Долдугаар сарын 1”-нд цагдаа нар иргэд рүү гал нээснээс болж, дөрвөн иргэн амиа алдсан. Тэдний нэг талийгаач Р.Мөнх-Эрдэнэ. Тэрээр Дорнод аймгийн Цагдаагийн хэлтэст хэв журмын цагдаагаар ажиллаж байжээ. Хотод цагдаагийн байгууллагад ажиллахаар шилжиж ирээд удаагүй байтал “долдугаар сарын 1”-ний үймээн болж, буудуулж амиа алдсан аж.  
Цагдаагийн экс дарга нарын шүүх хуралд буудуулж амиа алдсан хохирогч нарын ар гэрийнхнээс төлөөлөл болж, талийгаач Р.Мөнх-Эрдэнийн ээж Д.Тунгалаг оролцсон юм. Шүүх хурал завсарлах үеэр түүнтэй уулзахад “Тухайн үед Ерөнхий сайд байсан С.Баяр “Цагдаад хүн бууд гэсэн тушаал хэн ч өгөөгүй” гэж мэдэгдэж байсан. Шүүх хурал дээр цагдаагийн дарга нарын хэлж байгаагаар бол хэдэн цагдаа л хэрэг хүлээх нь. Би үүнд их харамсч байна. Миний хүү ч гэсэн тэдэнтэй адилхан цагдаа байсан. Дарга нар нь “Бид хүн буудах тушаал өгөөгүй” гэж мэдүүлж байна. Тиймээс цагдаа нар үнэнээ л хэлэх хэрэгтэй. Тухайн үед хэн нь тушаал өгснийг хэлэхгүй бол өөрсдөө ял үүрэх нь байна л гэж шүүх хурлын явцаас харлаа. Тэгээд ч дарга нараас хэн нь тушаал өгөв гэдгийг тогтоогоогүй байж, тэднийг ч яллаж болохгүй” хэмээн ярьсан юм.