Сонгуулийн ерөнхий хороо өнгөрсөн баасан гаригт хийсэн хуралдаанаараа МАХН-МҮАН-ын “Шударга ёс эвсэл”-ээс гаргасан гомдлуудыг хэлэлцээд, Н.Энхбаяр, Э.Батшугар, С.Нарангэрэл, Н.Санжаадорж нарыг бүртгэхээс татгалзсан Хорооны шийдвэрүүд үндэслэлтэй гэж үзлээ.
Мөн тус эвслээс УИХ-ын сонгуулийн 10 дугаар тойрогт нэр дэвшсэн З.Ойдов, 23 дугаар тойрогт нэр дэвшсэн С.Авирмэд, 23 дугаар тойрогт бие даан нэр дэвшсэн О.Сэлэнгэ нарыг бүртгэхээс татгалзсан тойргийн хороодын тогтоолууд ч үндэслэлтэй гэж үзсэн байна. Түүнчлэн хуралдаанаар Улсын Их Хурлын 2012 оны сонгуулийн саналын хуудасны тоог нэрийн жагсаалтад бичигдсэн сонгогчдын тоонд үндэслэн тав хүртэл хувийн нөөцтэй байхаар тооцож  баталлаа. Ийнхүү нийт нэг сая 924 мянга 978 ширхэг саналын хуудас хэвлэх ажил эхлээд байна.