Ардчилсан намын Хяналтын ерөнхий хорооноос тус намын гишүүн Т.Хасбаатарт холбогдох тогтоол гаргажээ. Шийтгэл ногдуулах тухай уг тогтоолд, “Өвөрхангай аймгийн Ардчилсан намаас 2012 оны тавдугаар сарын 31-ны 12/32 тоот албан бичгээр ирүүлсэн Т.Хасбаатартай холбоотой гомдлыг тус хороо энэ оны зургадугаар сарын 1-ний өдрийн хурлаар хэлэлцэн, Үндсэн дүрэм, журам зөрчсөн болохыг нотолж, буруутай үйлдээ залруулахыг зөвлөсөн тогтоол гарган өөрт нь хүргүүлсэн билээ. УИХ-ын ээлжит сонгууль болох гэж байгаа энэ эгзэгтэй үед намын эв нэгдлийг хангах үүднээс Т.Хасбаатарт намын нэр хүнд, эв нэгдэл, эрх ашигт харшилсан хэвлэлийн бага хурал хийсэн үйлдэлдээ дүгнэлт хийж алдаа дутагдалаа засах боломж олгосон боловч Хяналтын хорооны шийдвэрийг хэрэгжүүлэхгүй, хүсэл сонирхолгүй байгаа нь түүний дараа, дараагийн үйлдлээс тодорхой болсон тул Ардчилсан намын Үндсэн дүрмийн 3.3.5, 3.3.6, 3.6.1.4 болон “Ардчилсан намын гишүүний хариуцлагын журам”-ын 3.1.5 дахь заалтыг үндэслэн ТОГТООХ НЬ:
НЭГ. Т.Хасбаатар нь Ардчилсан намын Хяналтын хорооны шийдвэрийг эс биелүүлж, намын үйл ажиллагаанд сөрөг нөлөө үзүүлэх болсон тул Ардчилсан намын гишүүнээс хасах шийтгэл ногдуулахыг зүйтэй гэж үзсүгэй.
ХОЁР. Т.Хасбаатарт шийтгэл ногдуулахыг Ардчилсан намын удирдлагад даалгасугай” гэжээ.