“Өрхийн хөгжлийг дэмжих жил”-ийн хүрээнд Монгол Улсын Засгийн газраас санаачлан “Гэр бүл-Нийгмийн хөгжил” үндэсний чуулганыг энэ сарын 14-ний өдөр Төрийн ордонд зохион байгуулахаар боллоо. Чуулганаар монгол гэр бүлийн өнөөгийн дүр төрх, гэр бүл ба эрх зүйн орчны талаар үндсэн илтгэлүүдийг тавьж хэлэлцүүлж, гэр бүлийн хөгжлийн одоо ба ирээдүй, залуу гэр бүлийн өмнө тулгамдаж байгаа асуудал шийдвэрлэх арга зам, гарцын талаар зөвлөмж гаргах юм. Монгол Улс 2010 оны байдлаар нийт 742,3 мянган өрхтэй болж, нэг өрх дунджаар 3.7 ам бүлтэй. Тэр дундаа өрх толгойлсон эмэгтэйчүүдийн тоо жилээс жилд нэмэгдсээр байгаа. Тухайлбал, 2011 онд өрх толгойлсон эмэгтэйчүүдийн тоо 81,3 мянга болж, 2004 онтой харьцуулбал сүүлийн долоо жилийн хугацаанд 23,6 хувиар өсчээ. Гэр бүл цуцлалт сүүлийн жилүүдэд эрс өсч байгаа гэнэ.