“Оюутолгойн хөрөнгө оруулагч “Turquoise Hill Resources” компани Тавантолгойн цахилгаан станцыг барих, хөрөнгө босгоход зориулж 15 жилийн хугацаатай, нэг тэрбум ам.долларын санхүүгийн баталгаа гаргаж өгсөн” гэж  Монгол Улсын сайд М.Энхсайхан Ерөнхий сайдын “Шийдлийн цаг” уулзалтад оролцох үеэрээ хэлжээ.
Оюутолгойн далд уурхайн гэрээ нь УИХ-ын түвшинд маргаантай байгаа ч “Turquoise Hill Resources” компанийн санхүүгийн батлан даалт нь далд уурхайн бүтээн байгуулалтад тус компани итгэл хүлээлгэж байгаагийн илрэл гэж М.Энхсайхан дүгнэж байгаа юм байна. Мөн энэ үйл явдалтай холбоотойгоор Ерөнхий сайд Ч.Сайханбилэг “Эрдэнэс Монгол” компанийн ерөнхий захирал Б.Бямбасайханд “Дээрх боломжийг тооцож ажиллах шаардлагатай” гэж хэлсэн бол ирэх хавар Тавантолгойн цахилгаан станцын бүтээн байгуулалт, станцаа барьж эхлэх чиглэлд анхаарч ажиллахыг Монгол Улсын сайд М.Энхсайханд үүрэг болгожээ.