Нийслэлийн цагдаагийн газрын дарга асан хурандаа О.Зоригтыг ШШГЕГ-ын харьяа 461 дүгээр эмнэлгээс Клиникийн гуравдугаар эмнэлэг рүү шилжүүлсэн байна. Түүний бие эрс муудсан учир нарийн мэргэжлийн эмнэлэг рүү шилжүүлсэн гэнэ. Түүний ах О.Оюунцэрэн “Миний дүү Зоригт тавдугаар сарын 25-нд зүрхний мэс засалд орсон. Мэс заслын шарх нь одоо болтол эдгээгүй. Бие нь хүнд байгаа. Сахарын өвчний улмаас гар, хөлийнх нь хуруу мэдээгүй болж эхэлсэн. Одоо гуравдугаар эмнэлэгт ариутгалын боолт хийлгэх, цус шүүлгэх эмчилгээ хийлгэж байгаа. Сахарын хэмжээ нь 29, даралт нь 250-д хүрээд байгаа гэсэн. Хүний бие дэх сахарын хэмжээ ихэсвэл бүх эрхтний үйл ажиллагаа зогсох аюултай гэж эмч нар ярьсан. Байнга инсулин гэдэг тариа хийлгэж байгаа” хэмээн ярьсан юм.