Хаягийн бүртгэлгүй “тэнэмэл” хэмээх нэр зүүсэн хүмүүс нийслэлд цөөнгүй бий. Тэд шил лааз түүн хоногийн хоолоо залгуулдаг байна. Сонгуулийн санал хураалт дөхсөн энэ үед эдгээр хүмүүсийг бүртгэлтэй болгох ажил өрнөж эхэлжээ. Тодруулбал, Сүхбаатар дүүргийн цагдаагийн хэлтэс тэнэмэл байдлаар амь зуудаг, архаг архичин, хаягийн бүртгэлгүй хүмүүсийг тогтоох ажлыг зохион байгуулж байна. Уг ажлынхаа хүрээнд 127 хүнийг цуглуулж, бүртгэсэн аж. Мөн тэднийг зурагжуулж, гарын хээг нь авч нэгдсэн санд оруулжээ. Үүнээс гадна иргэн бичиг баримтгүйн улмаас өнөөдрийг хүртэл “Хүний хөгжил сан”-гаас олгож буй 21 мянган төгрөгөө ч аваагүй яваа 45 хүн байсан гэнэ. Иймд дүүргийн цагдаагийн хэлтсээс уг иргэдийг бичиг баримтжуулах асуудлыг УБЕГ-т тавьсан байна. Мөн зургаан хүнийг архины албадан эмчилгээнд хамруулжээ.