Хустайн нурууны байгалийн цогцолбор газарт хулгайн анчид 13 буга агнаж сав, чивийг нь авсан балмад хэрэг өнгөрсөн долоо хоногт гарсан билээ. Эдгээр бугын гурав нь хээлтэй байсан юм. Энэ хэрэгийг сүүлийн үеийн лазерийн буугаар зэвсэглсэн хүмүүс үйлдсэн гэдгийг нь мөрдөн байцаалтаар тогтоосон хэмээн Амьтаны эрх хамгаалах байгууллагын гишүүн С.Дамдинсүрэн мэдээлэв.  Тэрээр “Түүхий эдийн захуудаар явж үзэхэд бугын сав, чив 800 мянган төгрөгөөс 1000 ам.долларын үнэтэй байсан. Үүнийг захиалагчид нь хятадууд” хэмээсэн юм. Одоогийн байдлаар хулгайн анчидыг эрэн сурвалжилж буй бөгөөд үнэн зөв мэдээлэл өгсөн хүнд таван сая төгрөгийн шагнал олгохоор боллоо. Өнгөрсөн жилээс хойш эдүгээ тус цогцолбор газраас хулгайн анчид 44 буга намнаад буй аж. Одоо Хустайн нуруунд 700 гаруй толгой буга бий гэдэг.