Сонгинохайрхан дүүргийн шүүх өнөөдөр Гол нууруудын нэгдсэн хөдөлгөөнийхөн болох “Онги гол” хөдөлгөөний тэргүүн Ц.Мөнхбаяр,  удирдах зөвлөлийн гишүүн О.Самбуу-Ёндон, “Хүдэр гол” хөдөлгөөний тэргүүн Г.Баяраа, “Монгол Улсын төлөө зүтгэе” ТББ-ын гишүүн Г.Төмөрбаатар нарын дөрвөн хүнд холбогдох хэргийг хэлэлцэж, хэрэгсэхгүй болгох шийдвэр гаргалаа.  
Тэд хоёр жилийн өмнө Сэлэнгэ аймгийн Түнхэл тосгонд Гол нууруудын нэгдсэн хөдөлгөөнийхөн Урт нэртэй хууль хэрэгжихгүй байна гэж үзэн “Пураам”, “Сентерра гоулд” компанийн  техник рүү олон удаа буудсан хэрэгт холбогдсон юм. Нийслэлийн прокурорын газраас Ц.Мөнхбаяр, Г.Баяраа, О.Самбуу-Ёндон, Д.Төмөрбаатар нарт бусдын өмч хөрөнгийг санаатайгаар устгасан гэсэн үндэслэлээр яллах дүгнэлт үйлдэж, тус дүүргийн шүүхэд шилжүүлээд байсан юм. Гэвч шүүх эл хэргийг хэлэлцээд гэмт хэрэгт тооцохгүй байхаар шийдвэрлэлээ.