Хэвлэлийн хүрээлэнд Сүхбаатар аймгийн АН-ын ахмад гишүүн Ч.Доржпүрэв мэдээлэл хийлээ. Тэрээр аймгийн АН-ын гишүүн гэнэ. Ингэхдээ МАН-д мэдээлэгчээр ажиллаж байснаа мэдэгдлээ. Хамгийн ноцтой нь тэрээр  Ерөнхийлөгч асан Н.Энхбаярыг хөнөөх захиалга авч байсан гэнэ.
Ч.Доржпүрэв хэвлэлийнхний асуултад ийн хариуллаа.

-Та яагаад гэнэт ийм мэдээлэл хийх болов?
-Хамгийн түрүүнд Сүхбаатар аймгийн Ардчилсан холбоо, намын гишүүд дэмжигчдээс би иргэнийхээ хувьд эсрэг талын үзэл баримтлалаар орж дотоод мэдээллийг бусдад өгч байсандаа хүлцэл өчье. Яагаад ийм зүйл болчихов гэхээр Ардчилсан холбоо анх 1989 оны 12 дугаар сард хувьсгал хийхээр хэдэн залуус ирсэн. Би тэр үед тэр залуусыг дэмжиж нэгдэж байлаа. Ингээд Ардчилсан холбоонд элсчихээд байтал эсрэг намд мэдээлэл хийхийг Гомбосүрэн гэдэг хүн  санал болгосон юм. Би зөвшөөрч ардчиллын нэрийн дор МАН-ын мэдээлэгч болсон. Энэ бол 20 жилийн өмнөх үйл явдал шүү. Ингэж ажиллах явцдаа би мэдээж байнга мөнгө авдаг байлаа. 1989 онд анх мэдээлэгч хийх санал хүлээж авахдаа  20 мянган төгрөг авч байсан юм. 

-Та тэр хүнтэй яаж уулзаж ажилладаг байсан бэ?
-Товлосон газар зааж өгдөг байсан. Тусгай тэмдэгт газар гэсэн үг. Тэнд нь тодорхой хэмжээний мөнгө, ажиллах заавар байдаг байлаа. Хамгийн ноцтой нь 2008 онд энэ хүнээс би Н.Энхбаярыг алах даалгавар авч байсан. Надад их хэмжээний мөнгө, тусгай буу бас нэг зураг өгсөн. Хаана нь буудвал үхэх вэ гэдгийг нь заасан байсан. Н.Энхбаяр Ерөнхийлөгч байхдаа  2008 онд Сүхбаатар аймагт очих үед гэж ойлгож болно. Үүнийг хараад үнэхээр миний зүрх шимширсэн. Тэгээд багцалсан их мөнгөнөөс нэг ч төгрөг аваагүй. Тэнд нь орхисон. Ойролцоогоор 6 сая төгрөг байсан.Түүнээс хойш би тухайн үеийн МАХН буюу одоогийн МАН-аас холбоо тасарсан.

-Сонгуулийн өмнө үүнийг мэдээлж байгаа нь сонин байна. Таныг захиалгат мэдээлэл хийж байна гэж хардах байх?
-Яагаад мэдээлж байна гэхээр ард түмнийг зөв сонголт хийгээсэй, ийм зүйл хийлгэдэг байсан намыг битгий сонгоорой гэж хэлэхийг хүссэн юм.

-Тэгэхээр аллага хийхийг захиалагч нь  МАН уу. Тэр Гомбосүрэн гэдэг хүн  аль намынх вэ?
-Аль намынх гэдгийг нь мэдэхгүй. МАН-д ажиллаж байсан л биз. Ямар ч байсан намайг ардчиллынхны дунд ороод намын чухал бүртгэл, үйл ажиллагааны мэдээллийг хүргэж бай гэсэн даалгавар өгсөн.

-Та ингэж ярьсныхаа төлөө хариуцлага хүлээж чадах уу?
- Хариуцлага хүлээх тухай асуудал байвал хүлээнэ.