Санал тоолох автомат машинд монголчууд маш их найдлага тавьж буй. Өмнөх сонгуулиар сонгогчдын саналыг хэсгийн хорооныхон гараар тоолдог байсан. Энэ нь сонгууль будлиантах гол шалтгаан болсон гэсэн ойлголт иргэдийн дунд бий. Иргэдийн дунд үүссэн энэхүү эргэлзээг тайлах үүднээс энэ удаагийн сонгуульд санал тоолоход автомат машин ашиглахаар болсон. Дээрх машинд 100 хувь найдаж болно гэдгийг СЕХ-ныхон амласан. Арав хоногийн дараа болох УИХ, НИТХ-ын сонгуульд санал тоолох 2500 машин хүчин зүтгэнэ. Үүнээс одоогоор 1100 нь шалгаж үзээд гэрчилгээ олгочихсон байгаа аж. Түүнчлэн есөн аймагт 951 машин хүргэхэд бэлэн болжээ. Санал тоолох төхөөрөмжийг доргиож гэмтээхгүйн тулд БХЯ-ны нисдэг тэргүүдийг ашиглаж, аймгийн төвүүдэд хүргэж буй гэнэ.

Сонгогчдын боловсролд анхаарлаа хандуулж байна

УИХ, НИТХ-ын сонгууль холимог тогтолцоогоор явна. Ийм зарчмаар сонгууль өгч байсан туршлага сонгогчдод байхгүй. Тиймээс саналын хуудас хэрхэн бөглөх зааврыг СЕХ-ноос иргэдэд өгөхөд анхаарлаа хандуулж байгаа гэнэ. Саналын хуудаст саналаа хэрхэн тэмдэглэх талаар 900 мянган заавар, танилцуулга хэвлэснээ хэсгийн хороодоор дамжуулан айл бүрт хүргэх юм байна. Үүнд мандатын тоогоор болон нэг намыг сонгож, өмнөх дугуйг тусгай бал ашиглаж будах заавар бүхий зургийг хамт хэвлэжээ.

Саналын хуудас хэвлэх ажил дуусч байна

СЕХ өнгөрсөн өдрүүдэд сонгогчдын саналын хуудсыг хэвлэж, түүнийг унших машин,  тоног төхөөрөмжийн программыг шалгаж, гэрчилгээжүүлэх, улмаар орон нутагт  хүргэж эхлэхэд анхаарлаа хандуулжээ. Энэ удаагийн сонгуулиар  1.937.082 саналын хуудас хэвлэхээр баталсан аж. Одоо нийслэлийн сонгогчдын саналын хуудсыг хэвлэснээр энэ ажил дуусах гэнэ.

6000 орчим иргэний регистрийн дугаар зөржээ

Сонгогчдын нэрсийн жагсаалтад будлиан гарсан талаар АН-ынхан өнгөрсөн долоо хоногт мэдээлж байсан. Дээрх мэдээлэл үнэний ортой болохыг СЕХ-ноос батлав. Сонгуулийн төв байгууллагад ирсэн сонгогчийн нэрсийн жагсаалтад 6000 орчим хүний регистрийн дугаар зөрсөн, иргэний үнэмлэхний дугаар бичээгүй гэх мэт зөрчил илэрчээ. Иймээс УБЕГ-т дээрх бичиг баримтын зөрчилтэй иргэдийн материалыг буцааж өгчээ.

МАН-ынхан мунгинав

Ардчилсан намын жагсаалтад бичигдсэн Р.Гончигдорж гишүүн Сонгуулийн тухай хууль зөрчсөн талаар МАН-ынхан СЕХ-нд гомдол мэдүүлсэн юм. Р.Гончигдорж нэр дэвшигч жагсаалтын 12-т бичигдсэн байснаа байр урагшилж ес дугаарт өөрийн нэрээ бичүүлсэн гэсэн үндэслэлээр МАН-ынхан хандсан. Харин үүнд СЕХ-ны дарга Н.Лувсанжав ийн тайлбар хийв “МАН-ынхан  Р.Гончигдорж, М.Батчимэг хоёрын байр солигдсон тухай ярьсан юм билээ. СЕХ-нд  жагсаалтаа ирүүлэхээс өмнө хэвлэлээр гаргасан эрэмбэ дээр нь тийм байсныг МАН ярьсан байж болох юм. Бид бол намуудаас ирүүлсэн жагсаалтыг нягтлаад бүртгэж, олон нийтэд мэдээлсэн” гэлээ. Тэгэхээр хууль зөрчсөн үйлдэл биш болоод байгаа ажээ.