Нийслэлийн Улсын бүртгэлийн газраас сэтгүүлчдэд мэдээлэл хийлээ. “Хэвлэл мэдээллийн хэрэгслээр сүүлийн үед УИХ, НИТХ-ын сонгуульд сонгогчдыг давхар санал өгүүлж будлиантуулах гэж байна. Улсын бүртгэлийн байгууллага аль нэг намд үйлчиллээ гэсэн ташаа мэдээллүүд ихээр гарах болсон. Энэхүү мэдээллийг бид үгүйсгэж байна” хэмээн ярилаа. Сонгогчдын нэрийн жагсаалт давхцах үндэслэлгүй гэдгийг дараахь үндэслэлээр тайлбарлав. “Сонгуулийн өдөр хэсгийн хороонд санал өгөхөөр нэрийн жагсаалтанд орсон иргэдийн иргэний үнэмлэх, хурууны хээ, дижитал зургийн мэдээллийн сан суулгасан компьютер дээр бүртгэлийн байгууллагын итгэмжлэгдсэн төлөөлөгч ажиллана. Иргэн хурууны хээ өгөхөд тухайн иргэний зурагтай бүх мэдээлэл хоёр секундэд гарч ирнэ. Ингээд бүртгэлийн ажилтан иргэний үнэмлэхтэй тулгаж үзээд бүртгэлийн гурван хувь талон хэвлэнэ. Нэг хувийг нь бүртгэлийн ажилтан, хоёр дахь хувийг нь саналын хуудас олгох хэсгийн хорооны ажилтан, гурав дахийг нь иргэн өөрөө авна. Харин иргэн дахин орлоо гэхэд та бүртгэлд орсон гээд бүртгэлд хийгдэхгүй, талон хэвлэгдэн гарахгүй“ гэв.