Эх орны сэдэвтэй дуу дуншиж, дуншиж сонгуулиар л бөөн бөөнөөрөө төрөх болж. Угтаа бол өнөө жилээс улс төрийн намууд ямар нэгэн урлагийн үйл ажиллагааг ивээн тэтгэх, зохион байгуулах хориотой гээд Сонгуулийн тухай хуульд заасан бий. Гэтэл АН-ын Улаан цэнхэр өнгийн сүлдийг “Нар” дууны клипны баруун доод булангаас тодхон олж харна. МАН-ынхан ч бас дутахгүй гэсэн үү, хуучин уламжиллаа гээхгүй гэсэн үү ямартай ч “Бид бүгд нэг монгол” гэсэн дууг бүтээлгэж “бүх од”-оор дуулуулж, дүрсжүүлээд авсан. Клип бүтээхэд мөнгө “хаях” нь урлагийн үйл ажиллагааг ивээн тэтгэхэд ордоггүй ч юм уу, оруулаагүй ч юм уу? Энэ жил сонгуулийн сурталчилгаанд урлагийнханыг татан оруулах бяцхан заль нь бололтой. Эсвэл урлагийнхангүйгээр улс төрийн сурталчилгаа нэг л явахгүй байгаа юм болов уу? Гэтэл энэ удаад дуу шигээ гүн санаатай, содон шийдэл бүхий “Нар” дууны клип гарсан даруйдаа олны анхааралд өртөж, хэл ам дагууллаа.

Өнөөдөр “Ахмад багш нарын холбоо”, “Залуу багш нарын холбоо” хамтран хэвлэлийн бага хурал зарлаж тийм утга санаатай клип бүтээсэнд ихэд гомдолтой байгаагаа илэрхийлсэн юм.

Клипэнд СТА жүжигчин Д.Ганцэцэг багшийн дүрд тоглон “нар байхгүй, нар байхгүй ээ ...” хэмээн бяцхан сурагчдаа зандчин, ширээ цохидог хэсэг байдаг. Энэ дүр, дүрслэл нь багш хүний нэр сүрийг гутаан доромжилсон, нийгэмд буруу ойлголт түгээж байна хэмээн ахмад болон залуу үеийн багш нар үзэж байна. Түүгээр ч барахгүй олон нийтийг бослого тэмцэлд уриалан дуудсан, тэгэхдээ нэрт зураач Д.Амгалангийн “Ээжээ сайн байна уу” хэмээх алдарт бүтээлийг ашигласан нь зүй ёсонд нийцэхгүй байна гэв. Тэрч байтугай бага насныханд багшийн тухай буруу ойлголт төрүүлж байна гэж тайлбарласан юм. Тэд “ Багш хүн бол сурагчдынхаа оюун боловсролын төлөө харин нар мандуулж байдаг хүмүүс. Монголын багш нарын дунд сурагчдаа тэгж загнаж, ширээ цохиж уурладаг ёс зүйгүй багш байхгүй. Энэ клипийг үзсэн хүүхдүүд багш гэдэг хүнээс айгаад хичээл, сургуульдаа явахгүй гэвэл яана” хэмээн учирлалаа. Багш нар цаашдаа хэлж байгаа үг, хийж байгаа үйлээ сайтар бодож байхыг анхаарууллаа.