Ойрын өдрүүдэд ихэнх нутгаар дуу цахилгаантай, усархаг аадар бороо үргэлжлэн орох учраас иргэд, аж, ахуйн нэгж, байгууллагад Улсын Онцгой комиссоос дараахь сэрэмжлүүлгийг хүргэж байна.
Ерөнхий боловсролын сургуулийн сурагчдын амралт эхэлсэнтэй холбогдуулан бага насны хүүхэд усанд осолдож, амь насаа алдах тохиолдол гарч байгааг эцэг, эхчүүд, асран хамгаалагчид онцгойлон анхаарах.
Уул, уурхайн байгууллагад ашиглаж байгаа хиймэл нуур, тогтоол усны ойролцоох анхааруулах тэмдэг, хаалт, хамгаалалт хийхгүй бол иргэд орж амь насаа алдах тохиолдол гарсаар байна. Үүнд холбогдох мэргэжлийн байгууллага анхаарлаа хандуулж, илэрсэн зөрчлийг арилга.
Үер, усны аюулаас хамгаалах зориулалттай далан, суваг, шуудууг татах, сэргээх арга хэмжээ авах, албан байгууллага, шатахуун түгээх станцын аянга зайлуулагчийн ажиллагааг холбогдох мэргэжлийн байгууллагууд тогтмол шалгах.
Цаашид олон хоногоор үргэлжилсэн их халалтын улмаас аянга цахилгаан буух, уруйн үер, түр зуурын хүчтэй салхи шуурга үүсэх, голын усны түвшин огцом нэмэгдэх нөхцөл бүрдсэн учир иргэд сэрүүцэх зорилгоор гол, усанд орохдоо аюулгүй байдлаа сайн хангах, бага насны хүүхдийг харгалзах хүнгүйгээр гол ус руу явуулахгүй байх, хамт олон, найз нөхдөөрөө аялал зугаалгаар явахдаа архи, согтууруулах ундаа хэрэглэхгүй байж, учирч болзошгүй эрсдэлээс амь нас, эрүүл мэндээ хамгаалж, сонор сэрэмжтэй байхыг анхааруулжээ.