Халуун говьд хур дагуулан очсон Ардчилсан намын дарга Н.Алтанхуяг өчигдөр Дундговь аймгийн Эрдэнэдалай суманд иргэдтэй уулзав. Ардчилсан намын  дарга Н.Алтанхуяг, зөвлөх С.Отгонбаяр, Дундговь аймагт Ардчилсан намаас нэр дэвшигч Б.Наранхүү, жагсаалтаар нэр дэвшигч Б.Ургамалцэцэг, Р.Эрдэнэбүрэн нарын хамт очиж, намынхаа “Монгол хүн” мөрийн хөтөлбөрийг танилцууллаа.
Дундговь аймагт нэр дэвшигч Б.Наранхүүг дэмжиж яваа мэргэжлийн сүмогийн их аварга Хакухо М.Даваажаргал, Рюүо Э.Санчирболд, Монгол Улсын тод манлай уяач Ц.Хэнмэдэх зэрэг урлаг, спортын алдар цуутнууд нэгэн дор цугласан нь Эрдэнэдалай сумынхны нэг өдрийг хөл хөдөлгөөнтэй өнгөрүүлсэн. Нэр дэвшигч Б.Наранхүүг урлаг, спортын салбарынхан дэмжиж байгаагаа илэрхийлж, дундговьчууд “Нарны хүү”-гээ улстөрч болгон, нутгаа хөгжүүлнэ гэж итгэж байна гэж байв. Нутгийнхан ч түүнийг хэвлэлээр л муугаар бичиж байснаас биш, хүрээлэл сайтай хүн хэмээн дэмжиж хүлээн авч байсан юм.

Ардчилсан намын дарга Н.Алтан­хуяг Ардчилсан нам хүн бүр ажилтай, ор­­лого нь амьдралд нь хүрэлцдэг болохын төлөө бодлогоо чиглүүлэн ажиллаж байгааг дурдан, энэ бодлого хэрэгжихэд нөлөөлөх Дунд­говийн гаралтай Ардчилсан намын таван хүнийг УИХ-д нэр дэвшүүлээд байгааг сануулж байв. Мөн тэрээр 2000 онд Ардчилсан нам УИХ-ын сонгуульд ялагдахад ганцхан дундговьчууд Ж.Наранцацралт агсныг сонгож УИХ-д Ардчил­сан намын ганц төлөөлөл үлдээж байсанд талархлаа илэрхийлсэн юм.

Ардчилсан нам 2008 оны сонгуулиар сөрөг хүчин болсон ч гэлээ хамтарсан Засгийн газарт орж ажиллан амлалтаа биелүүлсэн. Ардчилсан намын ам­­­­­лалт биелснээр иргэн бүр баялгийнхаа хишгээс хүрт­­дэг болсон, Монголын нийгэм, улс төр, эдийн засгийн тогтворгүй байдлаас гарлаа. Харин одоо төрийн хууль ардын хүүхдэд хатуу, сайдын, саятны хүүхдэд үйлчлэхгүй бай­гааг өөрчлөх цаг нь болжээ. Ард­чилсан нам зургаан удаа­гийн сонгуульд таван удаад нь ялагдсан. Өөрөөр хэлбэл, хангалттай ялагдсан. Одоо ялалт шиг ялалтаар хийсэн шиг хийх цаг үе ирээд байна гэдгийг Ардчилсан намын дарга дурдаж байв.

Ардчилсан намын нарийн бичгийн дарга, Ардчилсан на­маас жагсаалтаар нэр дэв­шигч Б.Ургамалцэцэг мөн ир­гэ­дэд хандан, Ардчилсан нам “Монгол хүн” мөрийн хө­төлбөрөө  боловсруулахаар орон даяар явж байхад хүн бүхэн “Бид хүн шиг л амьдармаар байна” гэж хэлж байсан. Тийм учраас “Хүн шиг амьдаръя, Улс шиг хөгжье” гэсэн уриа маань амьдрал дундаас гарсан уриа. Цөөхүүл нь биш, олуулаа хөгжихийн тө­лөө бид хамтдаа зүтгэж урагшаа алхана” гэж байлаа.