БНХАУ-аас ажил хийхээр ирсэн иргэд гэмт хэрэгт холбогдон, улмаар монголчуудын эрх чөлөөнд халдаж, амь насыг нь хөнөөсөн тохиолдол цөөнгүй гараад байгаа. Тус улсаас манай улсад сугаа Элчин сайдын яамныхан Монголын Засгийн газар, ЦЕГ-тай хамтран өчигдөр хятад ажилчдад зориулсан хууль эрх зүйн сургалт зохион байгууллаа. БНХАУ-ын ЭСЯ-ны Консулын хэлтсийн дарга Лиу Жимин болон албаны бусад хүн, Нийслэлийн цагдаагийн газрын Олон нийттэй харилцах болон Гадаад харилцааны хэлтсийн ажилтнууд энэ сургалтад оролцсон юм.

Нийслэлийн цагдаагийн газрын Олон нийттэй харилцах хэлтсийн чиглэлийн ахлах байцаагч, цагдаагийн хошууч П.Эрдэнэцэцэг “Энэ оны эхний таван сарын байдлаар улсын хэмжээнд гадаадын 35 иргэн гэмт хэрэгт өртсөн. Үүнээс 10 нь Хятадын иргэн. Гадаадын 36 иргэн гэмт хэрэг үйлдсэнээс 11 нь хятад хүн. Тэдний ихэнх нь хүний биед хөнгөн болоод хүнд гэмтэл санаатай учруулсан, бусдыг залилан мэхэлж, татвар төлөхөөс зайлсхийсэн, согтуу үедээ тээврийн хэрэгсэл жолоодож бусдыг гэмтээсэн, танхайрсан гэх мэт гэмт хэрэг үйлджээ. Өмнөх оны мөн үетэй харьцуулахад, гэмт хэрэг үйлдсэн хятад иргэдийн тоо хоёр дахин нэмэгдсэн. Ийм үед БНХАУ-аас манай улсад суугаа ЭСЯ-ныхан цаг үеэ олсон чухал ажил хийж байна. Хятадаас барилгын ажил хийхээр ирж буй иргэд манай улсын хууль тогтоомж, тэр дундаа гадаадын иргэн ямар эрх эдэлж, ямар үүрэг хүлээдгийг мэддэггүй. Тухайн орныхоо хууль хяналтын байгууллагатай хамтарч, мэдээлэл хийж буй нь сайшаалтай” гэв.
Цагдаагийнхан гадаадын иргэд заавал мэдэж, мөрдөж байх ёстой хуулийн заалт, зөвлөгөө, сэрэмжлүүлгийг хятад, монгол хэлээр хэвлэж хятад ажилчдад тараажээ.