Сонгуульд саналаа өгөх өдөр хүртэл ердөө зургаахан хоног үлдлээ. Харин та саналын хуудсаа хэрхэн бөглөж, санал тоолох машинд яаж уншуулахаа ойлгож амжсан уу. Хэрвээ үгүй бол танд дараахь зөвлөгөөг хүргэж байна. Анхаарлаа хандуулна уу.

Хамгийн түрүүнд та бүртгэлийн ажилтанд иргэний үнэмлэхээ өгч хурууны хээгээ шалгуулна. Ингэсний дараа бүртгэлийн ажилтнаас саналын хуудсаа авч, сонгогчийн нэрсийн жагсаалтад гарын үсгээ зурсан бол сонгогчийн санал өгөх бүхээгт орж доорхи зааврын дагуу саналын хуудсаа будаарай.
Энэ сонгуулиар бид өмнөх шигээ сонгохыг хүссэн хүнийхээ өмнөх дугаарыг дугуйлахгүй. Харин сонгохыг хүссэн нам эвсэл болоод нэр дэвшигчийнхээ нэрийн өмнөх дугуй дүрсийг будна. Ингэхдээ илүү гаргахгүй, дутуу орхилгүй дугуй дүрсийг дүүртэл будаарай. Хэрэв та саналын будахаас өөрөөр тэмдэглэвэл таны хуудас хүчингүй болно шүү.

Саналын хуудсаа дугуйлс­ны­хаа дараа санал тоолох авто­мат машинд уншуулна. Ингэхдээ саналын хуудсаа аль ч талаар нь хийж болох гэ­нэ. Гэхдээ автомат санал тоо­лох машины дэлгэцэн дээр санал тоолоход бэлэн гэ­дэг бичиг гарах хүртэл түр хү­лээх хэрэгтэй. Энэ бичиг гарс­ны дараа саналын хуудсаа автоматаар машин нь татаад авчихна.

Сонгогч та гурван мандат­тай тойрогт саналаа өгөх ч, хүс­вэл нэгийг ч дугуйлж болно. Ха­рин мандатынхаа тооноос илүүг дугуйлбал санал тань хү­чин­гүй болох юм байна. Өө­рөөр хэлбэл, танай дүүрэг хоёр мандаттай боловч та гурван хүн дугуйлж болохгүй нь ээ гэсэн үг. Ингэвэл таны санал хүчингүйд тооцогдох юм байна.

Хэрвээ та санал өгөх хууд­сыг буруу бөглөснөө мэдвэл нэг удаа хэсгийн хорооны ажил­танд буцаан өгч, дахин нэг удаа саналын хуудас авч бол­но. Хоёр удаа дахин авах боломж­гүй гэнэ шүү. Харин бу­руу бөглөчихөөд буцаан өг­сөн хуудсаа заавал харж байгаад устгаарай. Тэгэхгүй бол санал будлих аюултайг анхаараарай.

Санал хураах байранд орсноос хойш та бас л хатуу дэглэм баримтлах ёстой гэнэ. Учир нь, саналын хуудсаа норгох, нугалах, гэмтээж болохгүй, маш цэвэрхэн бөглөх ёстой. Хэрэв норгож, гэмтээж, нугалбал санал тоолох машин уншилгүй, алдаа заадаг гэнэ. Мөн саналын хуудсанд тэмдэглэсэн саналаа баталгаажуулан зураг авах, камераар бичлэг хийхийг хатуу хориглох аж. Хэрвээ та саналын хуудсаа будсан л бол хуудсаа өөр хэн нэгэнд харуулж болохгүй, үүгээр ч зогсохгүй хэн нэгэнд аль нам эвсэлд, хэн гэдэг нэр дэвшигчид саналаа өгөх гэж буйгаа ярьж ч болохгүй. Яагаад гэвэл үүнийг сонгуулийн хуульд хорьсон төдийгүй ноцтой зөрчвөл баривчилж хорих хүртэл арга хэмжээ авна гэнэ. Ноцтой зөрчих гэдэгт нь эрхэм та бусдын бичиг баримтаар санал өгөх гэж оролдох, эсвэл хуурамч бичиг баримт бүрдүүлэх, бүр цаашилбал санал авах байранд өөр саналын хуудас оруулах, авч гарах зэрэг зүггүй үйлдлүүдээ тэвчихгүй бол болохгүй нь байна шүү.