Улс төрийн сонгуулийн санал хураалт хоёрхон өдрийн дараа болох гэж байна. Нэр дэвшигчид, намуудын сурталчилгаа ч өндөрлөж байна. Тодруулбал, санал хураах өдрөөс 24 цагийн өмнө элдэв янзын пиар зогсох ёстой гэж хуульд заасан байгаа. Энэ цаг хугацаа шөнийн 00:00 цагт дуусна. Сур­талчилгаа эхэлснээс хойш намууд ирэх дөрвөн жилд өөрсдийн хийж бүтээх ажлаа сонгогчдод тайлагнаж, тайлбарлан дэмжлэг авахаар уралдсан. Харин одоо ба­риа­ны зүг хурдалсаар байна. Сур­­талчилгаа өндөрлөх цаг ойр­тох тусам нам, эвсэл, нэр дэвшигчдийн сурталчилгаа эрчээ авч байна. Арга ч үгүй биз. Сонгогчдын итгэлийг олж авахын төлөөх эцсийн тэм­­цэл нь юм хойно тийнхүү цацаж буй биз.

Ер нь, сонгуульд өрсөлдөж, нэр дэвшиж буй нөхдийг улс төрийн хамгийн амбицтай хүмүүс гэхэд хилсдэхгүй байх. Албан тушаал эрх мэдлийн төлөө асар их хөрөнгө мөнгө заран өөр хоорондоо тулалдаж байгаа. Яагаад ийнхүү хэтэвчин дэх хэдэн төгрөгөө баран байж төр түшилцэхээр улайран буй нь ойлгомжгүй. Бас ойлгомжтой. Төрөөс төр­сөн тэрбумтангуудын талаар хэвлэл мэдээллээр бичиж, нийтэлдэг. Тэд УИХ-ын гишүүн хэмээх суудалд тухалснаар шүүх цагдаагийн хаалга татахгүй халдашгүй дархан эрхийн ард нуугдаж, тө­рийн ордонд байрлах өрөөнд зөөлөн сэнтийдээ тавтай, тухтайхан сууцгаана. Хийсэн зүйл нь илэрчихнэ, цагдаад дуудагдана хэмээн айх аюул байхгүй, амар тайван сууна гэсэн үг юм.

Ийм төрлийн хүмүүс парламент руу шургалахын тулд юу ч хийхээс буцахгүй дайрч байгаа. Өөрийгөө сонгуулахын тулд хууль зөрчин, худал хуурмаг зүйл хийсээр явна. Увс аймагт МАН-аас нэр дэвшин, тугийг нь атган, түшээ цол хүртэхээр өрсөлдөж яваа Б.Чойжилсүрэн, Ч.Хүрэлбаатар нар сонгогчдод мөнгө тарааж, саналыг нь худалдан авах ажил хийх болж. Үүнийг тус аймгийнхан ярих. Мөн сонгуулийн хэсгийн хороондоо ч матжээ. Гэвч тэдний хийсэн үйлдлийг авч хэлэлцэх нь битгий хэл тоох ч үгүй байгаа сурагтай. Б.Чойжилсүрэнг шаггүй бизнесмэн гэдэг. Жилд хэдэн арван тэрбумын ашиг орлого олдог. Тэрхүү их хэмжээний мөнгө хайрцаг савнаасаа хальж, багтахаа байчихсан болохоор сонгогчдод тараан дундалж буй бололтой. Иймэр­хүү үйлдэл хийвэл хэрхэн ший­дэхийг хуульд тодорхой заа­сан. Тодруулбал, Эрүүгийн хуульд төрийн эсрэг гэмт хэ­рэгтэн хэмээн үзнэ гэж тусгасан. Үүнээс гадна тодорхой хэм­жээний ял эдлүүлж, ха­риуцлага тооцох ёстой. Гэтэл мөнгө тарааж төрийн эсрэг гэмт хэрэг үйлдэн яваа эрхмүүдийн асуудлыг өнөөг хүртэл тойрог хэсгийн хо­рооныхон хэлэлцэхгүй байгаа нь хачирхалтай. Магад­гүй Б.Чойжилсүрэн, Ч.Хүрэлбаатар нарын эрх мэдлээс эмээж буй ч байж болох. Гишүүн, Засгийн газрын хэрэг эрхлэх газрын дарга гэсэн маш том албан тушаал хашдаг тул нэр дэвших эрхийг нь хасч, хуулийн дагуу шийдэж зүрхлэхгүй байгаа биз. Тиймээс ч намайг хэн хэлж, нохойг хэн саах вэ гэдэг шиг л харц дээгүүр алхаж явна.

Нэгэнт уг асуудлыг аймаг орон нутагтаа ший­дэж чадахгүй болохоор тус аймгийн сонгогчид сонгуулийн төв байгууллагад өргөдөл хүргүүлэн шийдүүлэх төлөвлөгөөтэй гэнэ. Сонгогчид тун удахгүй өргөдөл хүсэлтээ илгээх ажээ. Харин сонгуулийн төв байгууллагынхан асуудалд хэрхэн хандах бол. Тойрог хэсгийн хорооныхонтой адил байх болов уу, эсвэл асуудлыг удаашруулахгүй шууд шийдэх үү гэдэг таамаг төдий байна. Энэ мэт зүйл орон нутагт чамгүй олон гарсан бололтой. Гэвч хуулийн дагуу буруутанд хариуцлага тооцож чадахгүй байсаар. Зөвхөн нуун дарагдуулж, замхруулах л зорилготой байх шиг. Мөн Баянхонгор аймагт МАН-аас нэр дэвшсэн хүн ч ийм зүйл хийн, намайг сонгоорой хэмээн ярьж явсан нь илэрсэн. Сонгогчид буруутай үйлдлийн талаар мэдүүлсэн ч, уг гомдол мөн л тойргийн хороонд очоод хав дарагджээ.

Ерөнхийдөө сурталчил­­­­гаа­ны хугацаа өндөрлөж, санал хураах өдөр ойртсоор байгаа болохоор ийм төрлийн үйл ажиллагаа ихэсч магадгүй. Учир нь, өөрийгөө сонгуулж, иргэдийн саналыг авах эцсийн арга нь энэ. Цүнхтэй мөнгө өвөртлөн сонгогчдод тарааж, төрд гарах нь хамгийн найдвартай зүйл хэмээн үзсэн. Хар пиартай зэрэгцсэн мөнгө тараах ажил сурталчилгааны сүүлчийн өдрүүдэд эрчээ авсаар. Цаашид төрийн эсрэг гэмт хэрэг өдүүлэгчдийн толгойг илсээр л байх уу.