УИХ-ын сонгуулийн 22 дугаар тойрог нийслэлийн Баянзүрх, Налайх дүүрэгт Ардчилсан намаас нэр дэвшигч Ишбадамын Нарантуяад итгэж болно. Ингэж хэлэх олон үндэслэл бий.   
2004 оны УИХ-ын сонгуульд Ардчилсан намаас нэр дэвшин өрсөлдсөнөөс нь хойш Ишбадамын Нарантуяаг Монголын улс төр мэдэх болсон юм.
Ажлаас өөр юм бодох завгүй бизнесмен бүсгүй нэг л өдөр Ардчилсан намынхаа даалгавраар мөрийн хөтөлбөрөө бариад, Баянзүрх, Налайх дүүргийн ард иргэдтэй уулзан, амьдрал ахуйтай нь танилцах болов. Олон ч айлаар орж, олон хүнтэй уулзаж, сэтгэлийн үгийг нь сонссон. Ингэж явахдаа тэр бүр хотынхны мэдээд байдаггүй захын хорооллынхны амьдралын жинхэнэ бодит байдалтай нүүр тулгарсан...

2004 оны сонгуульд И.На­рантуяа ялагдсан. Ялагд­сандаа тэр гутраагүй. Харин монголчуудынхаа ямаршуухан ядруухан амьдралтайг мэдээ­гүй, анзаараагүй явсандаа гутарч, түүний цээж давчдах болсон.  Улс төрд эргэлт буцалтгүй орсон шалтгаан нь энэ. 2008 оны сонгуулийн дараа түүний хэлсэн үг санаанд үлджээ. Сонгуульд дэндүү их мөнгө зарцуулж, салхинд хийсгэлээ дээ гэсэн сэтгүүлчийн асуултад “Ардчиллын буянаар олж авсанаа эргээд ардчилалд зориулсан болохоор харамсах зүйл алга, харин ч ард түмнийхээ тухай үнэнийг олж харлаа” гэж билээ.

Дөрвөн жилийн дараа тэр дахиад л өнөөх тойрогтоо Ардчилсан намаас нэр дэвшлээ. Ардчилсан намын ҮЗХ-ны гишүүн, Ардчилсан эмэгтэйчүүдийн холбооны гүйцэтгэх захирал болж ирсэн. Энэ дөрвөн жилд И.Нарантуяагийн үзэл бодол, үг, үйлс хувирсангүй. Ардчилсан нам түүнийг улс төрд бодлогоор бэлтгэж, хурц ширүүн өрсөлдөөнд сойсон.   
Ардчилсан намд мэдлэг боловсрол, ажил үйлсээрээ түмэнд танигдсан олон шилдэг эмэгтэйчүүд бий. Тэр бүсгүйчүүдээс шалгарч, АЭХ-г удирдалцаж байгааг нь бодоход л И.Нарантуяагийн өнгөрсөн дөрвөн жилд хэр өсч томорсныг, улс төрчийн хувьд бяд суусныг илтгэнэ. Тийм ээ, Ардчилсан нам И.Нарантуяад итгэдэг юм. Түүний ардчилалд үнэнч, туйлбартай тууштай зан чанарт нь  итгэдэг.
Улс төрд хүмүүс янз бүрийн замаар, янз бүрийн учир шалтгаанаар хөл тавьдаг. Олонд дэлгэмээргүй мөрөөр орж ирэх нь ч  бий. Ишбадамын Нарантуяаг Монголын улс төрд хөтөлж оруулсан хүн бол Монголын нэрт улс төрч, АЭХ-ны тэргүүн Б.Дэлгэрмаа. Харахад дэндүү энгийн, гүдэсхэн төрхтэй И.Нарантуяад шийдвэл шийд­сэн шиг шийддэг, бусдын ир­гэдийг даасан шиг даадаг, тууштай чанар бий. Түүнийг нь намын нөхөд нь үнэлдэг юм. Үгээрээ бус үйл хэргээрээ өөрс­дийнхөө амжилтыг цогц­лоож чадсан И.Нарантуяа шиг эмэгтэйчүүд аль ч намд хэрэг­тэй.

Улс төрийн нам янз бүрийн үзэл бодолтой хүмүүсийн  цогц бүлгэм билээ. Тийм ч учраас маргалдах, байр суурь зөрөлдөх нь бишгүй. Өнгөрсөн дөрвөн жилд Баянзүрх дүүр­гийн Ардчилсан нам багагүй донсолгоотой байлаа. Хуучин, шинэ удирдлагуудын зөрчил, намын удирдах байгуул­лагынхаа анхааралд өрттөл хурцадсан. Энэ үед бизнес эр­хэлж, олонтой харилцаж, бууж өгөхдөө бууж өгч, ая эвийг нь олж чаддаг И.Нарантуяагийн аливаа асуудалд уян хатан ханддаг зан чанар намын нөхдөдөө дэм түшиг болсон.  Асуудалд шударга хэрнээ уян хатан хандах нь улстөрч хүнд чухал шаардлагатай чадвар. И.Нарантуяагийн энэ л чадварт нөхөд нь, Баянзүрх дүүргийн Ардчилсан намын гишүүд итгэдэг. Итгэсэндээ түүнийг 2012 оны сонгуульд Баянзүрх, Налайх дүүрэгтээ намаасаа ахин нэр дэвшүүлэхээр  100 хувь дэмжсэн. Тийм ч учраас И.Нарантуяагийн ялалтын төлөө намын нөхөд нь нойр, хоолоо хасан зүтгэн ажиллаж байна. Нөхөд нь түүнийг ялна гэдэгт, И.Нарантуяа өрсөлдөгч намаас нэр дэвшигч улс төрч эмэгтэйчүүдээс илүү гэдэгт дэндүү итгэлтэй байгаа.

Улс төрд эмэгтэйчүүд амжилттай явахад хань бүлийн дэмжлэг хамгаас чухал. И.Нарантуяагийн хань Ц.Бат-Энх гэргийдээ итгэдэг. Хань нөхөртөө үнэнч, журамтай, үр хүүхдэдээ халамжтай, амьдралдаа зорилготой байна гэдэг монгол эмэгтэй хүний нандин чанар. Ийм л нандин эмэгтэйчүүдийн сэтгэл, зүтгэл дээр амьдрал, Монголын тусгаар тогтнол тогтож байгаа юм. Хар бага насандаа нэгнээ олж хайрлаж,  ижилдэн дасч, хамтдаа амьдралаа босгож, амжилтаа цогцлоож чадсан эр нөхөрт нь “гэргийн минь зорьсон, зүтгэсэн нь бүтээсэй” гэсэн сэтгэлийн сайхан ерөөл бий. Ханилсандаа үнэнч, журамтай эмэгтэй анд нөхдөөсөө урвахгүй, хувирахгүй ээ. Яс, маханд шингээстэй төрдөг үнэнч шударга зан, эцэг эхээс өвлөж авдаг журамт чанар нь өөрчлөгдөхгүй.

И.Нарантуяад Ардчилсан нам шиг, Баянзүрх дүүргийн Ардчилсан намын гишүүд шиг, бас түүний гэр бүлийнхэн, найз нөхдөөс нь дутуугүй итгэж байгаа  олныг төлөөлж Ишбадамын Нарантуяад итгэж болно хэмээн нийтлэлээ гарчигласан билээ.
Монголын ардчилал, Ард­чилсан нам, Ишбадамын Нарантуяа гурав салшгүй холбоотой. Ардчиллыг дэм­жигч хэн бүхэн Ишбадамын Нарантуяаг дэмжих нь гар­цаагүй ээ. Түүнд амжилт хүсье!