Хотын дарга гэдэг Засгийн газрын жижиг агентлагийн удирдлага биш. Ерөнхий сайдтай мөр зэрэгцэн алхах зоригтой, зангарагтай удирдагчтай хот л хөгжих учиртай. Бидний хамгийн ойрын жишээ бол Москва хот байна. Хотын дарга нь Засгийн газартайгаа эн зэрэгцэх хүчтэй. Дургүй нь хүрвэл Ерөнхийлөгч рүүгээ “Таны суудаг Кремль Москвад байрладаг шүү” гээд чангахан дуугарчихдаг.
Өнөөдрийн Улаанбаатарт нэг хэсэг нь тансаг байшинд халуун устай, бие засах өрөө тухтай амьдарч байхад нөгөө хэсэг нь шороотой гудамжинд харанхуйд хаягдчихаж. Энэ нь мэдээж гэр хороолол. Мөн өндөр хөгжилтэй орныхон жуулчид Улаанбаатарт ирээд “Энэ тэгээд хот гэж үү” хэмээн гайхаж, гэр хороолол дахь айлууд хаана бие засч, яаж усанд ордгийг лавлан асууж, хотын удирдлагуудыг ичээдэг. Тэгвэл хоёр хуваагдсан ийм хотыг орхиж, шинэ цагийн нийслэлд амьдрахыг залуус хүсч, тэмүүлж байна. Хот ертөнцийн хоёр туйл биш ердөө ганцхан стандарттай болохын төлөө залуус сонголтоо хийнэ.

Хэн ч харсан хотын бүхий л бэрхшээлийн эхлэл нь гэр хороолол. Утаа, агаарын бохирдол, замын түгжрэл гээд хотынхны түмэн бэрхшээлийн эхлэл нь гэр хороолол. Хэрвээ гэр хорооллыг инженерийн шугамд холбочихвол бидний эрүүл мэндийн дайсан болоод буй утаа үгүй болж, бид цэвэр агаараар цээж дүүрэн амьсгална. Тэгээд ч гэр хороолол инженерийн шугамд холбогдоогүй болохоор тэнд сургууль, цэцэрлэг, кино театр аль нь баригдахгүй. Тиймээс хүн л юм хойно сургуульд сурах гэж, эмнэлэгт үзүүлэх гэж, найзуудтайгаа цагийг зугаатай өнгөрүүлэх гэж хотын төвийг зорино. Улаанбаатарт зөвхөн төв хэсэгтээ инженерийн шугамтай болохоор л ингэж зам түгжирч, бид алтан цагаа түгжрэл дунд өнгөрөөж байна. Тиймээс одоо бид гэр хорооллыг инженерийн шугамд холбуулахын төлөө саналаа өгнө.

Инженерийн шугам хөрөнгө оруулалтыг дагуулдаг. Тэгэхээр инженерийн шугамд холбогдсон таны газар одоогийнхоос хэд дахин үнэд хүрч, танд мөнгө хэрэггүй, зөвхөн үр хойчдоо өвлүүлэн үлдээх газраа л авч үлдье гэж боддог болох тийм л нийгэм ойрхон хүлээж байна. Тэгээд ч газраа инженерийн шугамд холбочихоод барьцаанд тавьж зээл авдаг болох мөч ирж явна. Банк гэдэг хүнд биш хөрөнгөнд зээл өгдөг бичигдээгүй хуультай тул ирээдүйд та барьцаанд тавих хөрөнгөгүй хэмээн халаглах хэрэггүй болох нь ээ. Энэ бүхнийг хийх хүн нь та бас би.