Улсын Бүртгэлийн ерөнхий газраас сонгогчдийн нэрийн жагсаалтыг хамгийн сүүлийн байдлаар эцэслэн гаргасан тухайгаа олон нийтэд албан ёсоор мэдээлэл хийлээ. Тэд нэрсийн жагсаалтаа гурван үе шаттайгаар гаргажээ. Нэгдүгээрт нь өнгөрсөн гуравдугаар сарын 15-ны өдрөөс сонгогчдын нэрсийг өөрийн цахим хуудсанд байршуулжээ тэндээс иргэд өөрийнхөө мэдээлэл үнэн зөв байгаа эсэхийг шалгаж баталгаажуулсан байна. Энэхүү хуудсанд 1829879 иргэн санал өгөхөөр бүртүүлсэн байна. Сонгогчдын нэрийн жагсаалтыг цахим хуудсанд байршуулсанаар сонгогч өөрөө хяналт тавих нөхцөлийг бүрдүүлсэн. Уг жагсаалтандулсын хэмжээнд нийт сонгогчид хяналт тавих боломж бий болсон бөгөөд төр засгийн байгууллагуудад давхар хяналтхийх боломж олдож байгаа юм. УИХ-ын сонгуулийн хуулийн дагуу сонгууль болохоос 55 хоногийн өмнө сонгогчдын нэрийн жагсаалтыг цаасаар болон цахим байдлаар үйлдэж СЕХ болон Улсын Бүртгэлийн байгууллагад хүлээлгэн өгнө гэж заасны дагуу тав дугаар сарын гуравны өдөр 1839984 сонгогчийн нэрийг албан ёсоор УБЕГ–т хүлээлгэн өгсөн байна. Сонгогч зургадугаар сарын 18–ны өдөр хүртэл өөрийн болон өрхийн гишүүнийхээ талаар санал гомдол өгнө гэсэн хуулийн дагуу иргэдээс ирсэн санал гомдлыг хянан шалгаж үзээд хамгийн сүүлийн байдлаар 1833478 сонгогч зургадугаар сарын 28 –ны өдөр сонгуульд санал өгөх нь тодорхой болсон байна. 2012 оны сонгуульд нийслэл хотоос 804470 сонгогч, харин орон нутгаас 1029008 сонгогч саналаа өгөх ажээ.


Энэ талаар бид УБЕГ–ын дарга Л. Амарсанаагаас тодруулсан юм

-Сонгуулийн дараа иргэдийн нэр зарим хэсгийн хороон дээр давхцсан болон нэрийн жагсаалтанд байхгүй байна гэсэн санал гомдол гардаг. Энэ жил ийм асуудал гарахгүй гэж итгэж болох уу?
-Сонгогчдын нэрийн жагсаалтыг хэсгийн хороо бүр дээр нэрийг нь тулган гаргасан байгаа. Жишээлбэл сонгуулийн 26 дугаар тойрог болох СХД-тнийтдээ 80 хэсгийн хороо ажиллаж байна. Энэ 80 хэсгийн хороо тус бүрт сонгогчдийн нэрийг тулгаж үзнэ.Дараа нь нийслэлийн хэмжээнд байгаа 359 хэсгийн хороонд нэрийг нь давхцсан эсэхийг шалгана. Ингээд Улаанбаатар хотод давхцаагүй бол хорин нэгэн аймгийн хэсгийн хороодтой давхцаж байна уу? гэдгийг нь эцэг эхийн нэр, өөрийн нэр, регистрийн дугаар, шинэчилсэн бүртгэлийн хурууны хээ зэргээр нь шалгаж үзсэн юм. Энэ 1833478 сонгогчийн нэрийн жагсаалтанд ямарч асуудал байхгүй гэж ойлгож болно.

-Хэрэв ямар нэгэн  асуудал гарвал хариуцлагыг нь хэн хүлээх вэ?
-Сонгогчдын нэрийн жагсаалтад ямар нэгэн асуудал байхгүй гэдгийг дахин хэлье. Хэрэв ямар нэгэн асуудал гарвал УБЕГ буюу бид бүхэн албан ёсоор хариуцлагаа хүлээнэ.

-Нэг хаяг дээр олон хүн байна гэсэн мэдээлэл иргэдээс ирсэн. Энэ асуудал дээр та ямар хариулт өгөх вэ?
-Хувь хүн болон нам эвслүүдээс ирсэн санал гомдолын дагуу УБЕГазар цагдаа болон тагнуулын байгууллагуудтай хамтран шалгаж үзэхэд ийм асуудал байхгүй гэсэн дүгнэлт гарсан байгаа.

-Танайд нийтдээ хэдэн санал гомдол ирсэн бэ?
-Нийтдээ хориод санал гомдол ирсэн. Бид бүхэн тус бүрийг нь нарийвчлан нягтлан шалгаж шийдвэрлэсэн.

-Ямар шалтгаанаас болж сонгогчдийн нэрийн жагсаалтанд будилаан үүсч байна вэ?
-Манай иргэд ихэвчлэн нэг газар оршин сууж байгаад өөр тийшээ шилжихдээ шилжилт хөдөлгөөн хийлгэхгүй байгаа нь хүндрэлтэй байлаа. Мөн түр хугацаагаар оршин сууж байгаа газраа иргэд маань шинээр бүртгэлээ хийлгэдэггүй нь будилаан үүсэх нөхцөл болж байсан.

-Өнгөрсөн жилүүдэд нэгээс дээш хэсгийн хороон дээр санал өгөх явдал гарч байсан. Энэ жил тийм зүйл давтагдахгүй гэж ойлгож болох уу?
-Санал өгөх 28 –ны өдөр сонгогч эхлээд санал өгөх нэрийн жагсаалтанд тулгуулна, дараа нь өөрийн зурагтайгаа тулгуулж мөн эсэхийг шалгуулна, эцэст нь өөрийн хурууны хээгээ тулгуулснаар санал өгөх эрхтэй болно. Ингэж өгсөн таны санал хэдэн цаг хэдэн минутанд аль хэсгийн хороон дээр өгсөн гээд бүх мэдээлэл чинь цахим бүртгэлд орох болно. Хэрэв өөр хэсгийн хороон дээр саналаа өгөхөөр очих юм бол та саналаа тэд дүгээр хэсгийн хороон дээр тэдэн цаг тэдэн минутанд өгсөн байна аа та дахин санал өгөх боломжгүй гэсэн хариулт өгөх болно. Тиймээс дахин санал өгөх боломж огт байхгүй.

-Зарим сонгогч өөрийгөө аль хэсгийн хороонд саналаа өгөх ёстойгоо мэдэхгүй байгаа бол яах вэ?
-Бид бүхэн цахим байдлаар болон тухайн орон нутгийнх нь нэгж байгууллагаар нь дамжуулан аль хэсгийн хороонд очиж саналаа өгөх ёстойг нь зарласан. Хэрэв энэ мэдээллийг аваагүй хүмүүс байвал өөрийн оршин сууж байгаа үндсэн хаягийнхаа дагуу очиж мэдээлэл авах боломжтой.