Мөн ч их хүлээсэн дээ, монголчууд энэ өдрийг. Тийм ээ, их хүлээсэн. 22 жил гэдэг бага хугацаа биш. Магадгүй 1990 онд төрсөн хүүхэд өдгөө Ардчиллын төлөө хоёр дахь сонгуулиа өгч байгаа. 2012 онд сонгуулийн насны иргэдийн 40 орчим хувь нь Ардчилсан намд итгэж саналаа өгч. Ингэж сонгогчид Ардчилсан намыг сонгохдоо ирэх дөрвөн жил олон зүйлийг хийж чадна гэж итгэсэн. Итгэсэн учраас тэд олуулаа Ардчилсан намыг сонголоо. Олууллаа Ардчилсан намыг сонгохдоо олон зүйлийг хүссэн. Өнөөдрийн өөхнөөс маргаашийн уушиг гэдэг дээ. Өнөөдөр нүд хуурч байгалийн баялгийн хувь гэж сар бүр хэдхэн төгрөг авахдаа биш байгалийн баялгийнхаа жинхэнэ эзэн нь байж насан туршдаа ашиг шимийг нь хүртэж амьдрахыг хүсч байна.

Хүүхэд тоглох талбайгүй, хөгшид нарлах газаргүй болтлоо хумигдсан нийслэлдээ шигдэж амьдрах биш уудам газар нутагтаа хүн шиг амьдрахыг хүссэн учраас Ардчилсан намыг монголчууд сонголоо. Төрөх эмнэлгийн барилгад мөнгө хандивлахаас жийрхэж, намын байрандаа өөрт байгаа мөнгөө өгдөг төрийн түшээдтэй байхыг ард түмэн хүссэнгүй. Тиймээс монголчууд Ардчилсан намыг сонгож. Байгалийн баялгаа ганц гарцаар зөөж, ганц улсад бэлэг болгож өгөхийг хүсээгүй учраас ард түмэн Ардчилсан намыг дэмжсэн. Өвлийн цэнхэр тэнгэрээ дахин харахыг хүссэн учраас нийслэлийн сонгогчид Ардчилсан намд саналаа өгсөн. Гэр хорооллынхон гэж үеийн үед адлагдахгүйн тулд тэд ч бас Ардчилсан намыг сонгоогүй гэж үү. Мэдээж хүн бүр амины орон сууцтай болж, өөрийн эзэмшлийн газар дээрээ эзэн нь байхыг хүссэн учраас энэ намыг сонгожээ.
Тийм ээ, энэ бүхнийг хүссэн учраас монголчууд Ардчилсан намыг сонголоо. Ардчилсан нам ард түмнийхээ итгэлийг дааж, энэ бүхнийг хийнэ гэдэгт итгэж хүлээх л үлдлээ.