Энэ парламентад гурван бүлэг ажиллана. АН, МАН, МАХН-МҮАН гэсэн үг. Мөн ИЗНН хоёр суудлаа авч үлдсэн. Ингэхдээ УИХ-ын гишүүн Д.Энхбат өөрийн хүсэлтээр улс төрийн хаалгыг хаасан бол МҮХАҮТ-аар овоглож өнөөг хүрсэн С.Дэмбэрэл түүнийг орлох нь. Үүнээс гадна хүсвэл эмэгтэйчүүд бас бүлэг байгуулж болно. Тэд урьдчилсан байдлаар есүүлээ парламентад орж ирж, түүхэнд анх удаа хамгийн олон эмэгтэй гишүүнтэй болсон юм. Эмэгтэйчүүд улс төр ярилгүйгээр нэгдэж чаддаг зүйл нь хүүхэд, боловсрол, эрүүл мэнд гээд олон сэдэв бий учраас ирэх дөрвөн жилд төр уян хатан болох горьдлого төрж байна. Сонирхолтой нь, МАН-аас НАМЭХ-ны ерөнхийлөгч Д.Оюунхорол ганцаараа улс төрд эргэн иржээ.
Үүнээс гадна 2012-2016 онд ажиллах парламентад Д.Лүндээжанцан, Д.Дэмбэрэл, Ц.Нямдорж хэмээх хуучны хүмүүс эргэн ирснээс гадна Л.Эрдэнэчимэг, С.Одонтуяа, С.Дэмбэрэл нараар тэргүүлсэн 25 гишүүн цоо шинээр парламентад анх удаа хөл тавих гэж байна.