Улсын Дээд шүүх Цөмийн энергийн газрын дарга С.Энхбатыг Засгийн газрын тогтоолоор албан тушаалаас нь огцруулсан асуудлыг өчигдөр хэлэлцэж, түүнийг хууль эрх зүйн үндэслэлгүй огцруулсан байна гэсэн шийдвэр гаргалаа.  
Түүнийг өнгөрсөн оны намраас нийгэмд цочрол өгч, шуугиан дэгдээгээд байсан цөмийн хаягдлын асуудалд хариулт өгч чадаагүй, ажлаа муу хийсэн гэсэн үндэслэлээр одоогоос долоон сарын өмнө ажлаас нь чөлөөлсөн юм. Харин С.Энхбат эл шийдвэрийг хүлээн зөвшөөрөхгүй, Засгийн газрыг Сүхбаатар дүүргийн шүүхэд өгсөн. Тус дүүргийн шүүх түүний гаргасан нэхэмжлэлийн дагуу асуудлыг шалгаад Засгийн газрын дээрх шийдвэр үндэслэлгүй байна гэсэн шийдвэр гаргасан билээ.

Засгийн газар давж заалдсан боловч анхан шатны шүүхийн шийдвэрийг хэвээр баталсан юм. Тиймээс Засгийн газар хяналтын буюу Улсын Дээд шүүхэд хандсан учир өчигдөр асуудлыг хэлэлцээд мөн л өмнөх шийдвэрүүдийг хэвээр үлдээлээ.
Цөмийн энергийн газрын даргаар өдгөө Г.Манлайжав ажиллаж байгаа. Тэрээр өмнөх дарга С.Энхбатыг хэд хэдэн аж ахуйн нэгжид хууль бусаар тусгай зөвшөөрөл олгосон хэмээн буруутгаж байлаа. Нийслэлийн Захиргааны хэргийн шүүх хууль бусаар тусгай зөвшөөрөл олгосон асуудлыг хэлэлцэж, С.Энхбатыг буруутгасан шийдвэр гаргаад буй. Тодруулбал, түүнийг “Прайм энержи надер ресурс”, “Нейшил ураниум ресурс”, “Моннуклер”, “Монгол 3000”, “Том зам” зэрэг таван компанид хууль зөрчиж тусгай зөвшөөрөл олгосныг тогтоосон гэнэ. Эдгээр компанид олгосон тусгай зөвшөөрөл Цөмийн энергийн газарт бүртгэлтэй тусгай зөвшөөрөлтэй болон мөн аймгийн тусгай хэрэгцээний газартай давхацсан байжээ.  Мөн С.Энхбатыг эрх мэдлээ хэтрүүлэн найман аж ахуй нэгж байгууллагад 21 тусгай зөвшөөрлийг олгосон гэх мэдээлэл ч байна.