Газар хөдөлгөөнийхөн “Гэр хорооллын хоёрдугаар чуулган”-ыг өнөөдөр 12:00 цагт хийхээр болсон. Гэвч уг хурал зарим нэг урьдчилан тооцоолоогүй шалтгааны улмаас товлосон хугацаандаа болж чадахгүйд хүрч, түр хойшлуулахаар шийдвэрлэсэн талаар УИХ-ын гишүүн Э.Бат-Үүл мэдээллээ. Харин зохион байгуулах хугацааг жич товлон, олон нийтэд зарлахаа дуулгав. Энэ үеэр Яармагт газар олгож байгаа асуудлын талаар лавлаж “Сонгуулийн үед иргэдтэй уулзах үедээ АН-ыг сонговол Яармаг орчимд байгаа газрыг олгоно гэж хэлсэн учир өнөөдрийн асуудал үүсч байх шиг” хэмээн асуухад тэрээр “Болж буй үйл ажиллагаанд маш нухацтай хандах ёстой. Яагаад ийм зүйл үүсэв гэдгийг нягтлах хэрэгтэй болов уу. Иргэд хэн нэгний өдөөн хатгалганд автсан нь ажиглагдсан. Жишээлбэл, нэг хүн сонгуулийнхаа амлалтыг биелүүлэх ёстой гэж ярьж байна билээ. Бид биелүүлнэ. Гэхдээ өнөөдөр сонгуулийн дүн эцэслэн гараагүй, шинэ сонгогдсон ИТХ нь бүрэн эрхээ хэрэгжүүлж эхлээгүй, Засаг дарга нар ч томилогдоогүй явна. Ийм байхад амлалтаа хэрэгжүүл гэх нь хэр оновчтой юм бол. Тиймээс иргэддээ хандан хэн нэгний өдөөн хатгалгад бүү автаарай гэж хэлэх байна” гэв.
Мөн газар олгох асуудал нь хуулийн дагуу, төлөвлөлтөд орсон байх ёстой. Тухайн газар нь хуулийн хүрээнд олгогдоогүй бол баталгаажих ямар ч боломжгүй, үнэ цэнэгүй аж. Үүнээс гадна зөвшөөрөгдөөгүй газар ямар нэгэн зүйл барихыг хориглодог юм байна. Ерөнхийдөө АН хуулийн хүрээнд амлалтаа хэрэгжүүлж, биелүүлнэ гэдгийг тэрээр онцоллоо.