Шүүхийн шийдвэрийг ил тод нээлттэй байлгах зорилгоор шүүхийн шийдвэрийн цахим сан нээжээ. Ерөнхийлөгчийн хуулийн бодлогын ахлах зөвлөх П.Цагаан, Шүүхийн ерөнхий зөвлөлийн гүйцэтгэх нарийн бичгийн дарга Н.Ганбаатар, Улсын Дээд шүүхийн Захиргааны хэргийн танхимын тэргүүн О.Зандраа, Шүүхийн ерөнхий зөвлөлийн Мэдээллийн технологийн тасгийн дарга Д.Мөнхзориг нар өчигдөр мэдээлэл хийсэн юм.

Энэ нь Шүүхийн шинэтгэлийн хүрээнд шүүхийг ил тод нээлттэй болгох зорилгоор хийж буй томоохон ажлуудын нэг гэдгийг тэд онцлов. Шүүхийн мэдээллийн цахим санд 2011 оноос хойшхи анхан шатны шүүхийн шийдвэр, тогтоол, шүүгчийн захирамж, шийтгэх /цагаатгах/ тогтоол, давж заалдах шатны шүүхийн магадлал, хяналтын шатны шүүхийн тогтоолыг оруулжээ. Ингэхдээ хувь хүн, байгууллага, төрийн нууцтай холбоотой шийдвэрээс бусдыг татаж, хэвлэж авах боломжтой гэнэ. Түүнчлэн уг цахим сангаас холбогдох шүүхүүдийн хаяг, утас, факс, шүүх хурлын зар, тойм зэргийг үзэх боломжтой юм байна.