Ээлжит сонгуулийн үр дүн нэгэнт тодорхой болчихоод байна. АН олонхи, МАН цөөнх, МАХН-МҮАН-ын Шударга ёс эвсэл парламентад арав орчим суудал авах нь. Харин ИЗНН-аас жагсаалтынх нь эхний хоёр хүн УИХ-ын гишүүн болно. Сонгуульд ялалт байгуулна хэмээн бат итгэлтэй байсан Ардын намынхан ялагдсандаа итгэж өгөхгүй хэсэг балмагдан, зарга үүсгэж үр дүнг өөрчлөх гэж хэсэг зүтгэлээ. Гэвч тус намынхны зорилго биелсэнгүй. Ялагдал хүлээсэн нь намын удирдлагуудын буруу гэж гишүүд нь дүгнэв. Жагсаалтын эхэнд нэр цэвэр хүмүүс ороо­гүй, эмэгтэйчүүдийн төлөөл­лийг араар бичсэн хэмээн шүүмжлэл дагуулсаар. Мөн АН шиг эмх цэгцтэй, бүх төлөөллийг эн тэнцүү оруулж, элдэв асуудалд орооцолдож байгаагүй хүмүүсээ жагсаасан бол ялах боломж байсан гэх яриа ч байна. Энэ бүхнээс үүдэлтэйгээр намын удирдлагуудаа солих асуудлыг ч хөндөхөөр зэхэж байгаа тухай бор шувуу нисч байгаа. Бага хурал, Их хурлаа шил дарааллуулан хуралдуулж, на­мын дарга С.Батболд, ерөнхий нарийн бичгийн дарга У.Хүрэлсүх болон бусад эрх мэдэлтнүүдтэйгээ хариуцлага тооцох юм гэнэ. Нэгэнт өр­сөл­дөөнд дийлж чадаагүй юм хойно суудлаа тавьж өгөх ёстой. Сонгуулиас өмнө ч тэд ам гарч байсан.

Тодруулбал, ялалт байгуу­лахгүй бол хар толгойгоороо хариуцна, хариуцлагаа хүлээнэ хэмээн хэлсэн удаа ч бий. Дээрх жир­гээтэй зэрэгцэн Ардын нам дотор нэгэн яриа түгэх бо­лов. Өөрөөр хэлбэл, бүрэн эрх нь дуусч, төгсөлтийн үдэш­­лэгээ хийх гэж буй УИХ-ын даргаар ажиллаж байгаа Д.Дэм­бэрэл дахин түшээ болохгүй хэмээн нэрээ татаж, тэтгэвэрт гарч магадгүй гэх. Тэрээр намын жагсаалтаар парламент руу зүтгэх хүмүүсээс гуравт эрэмбэлэгдсэн байгаа. Уг нь, ногоон гэрлээр төр түшилцэх суудалд очих нэгэн. Чухам ямар учраас УИХ-ын гишүүний суудлаас татгалзах болсон нь тодорхойгүй байна.

Магадгүй нас дээр гарсан болохоор үр ачаа тойруулан гэртээ суух хүсэлтэй ч байж бо­лох. Хэрэв эрхэм дарга үнэхээр нэрээ татаж, түшээ цолноос татгалзвал түүний оронд Д.Сарангэрэл хатагтай улс төрд орж ирэх юм байна.Тус намын эмэгтэй нэр дэв­шигчдээс ганцхан Д.Оюун­хорол л сонгогдсон. Магадгүй бор шувууны жиргээ биелж, ангийн дарга төгсөлтийн үдэшлэгээ хийгээд тэтгэвэртээ суух аваас тус нам хоёр эмэг­тэй гишүүнтэй болж, тэд нар дөрөө харшуулан хатирах нь.