Ашигт малтмалын газрын дарга асан Д.Батхуяг өлсгөлөн зарласан тухай мэдээлэл чих дэлсэв. Түүнийг өлсгөлөн зарласан тухай мэдэгдэл хийхээр өчигдөр хэвлэлийн бага хурал хүртэл товлосон байлаа. Гэвч тодорхойгүй шалтгаанаар уг хурал хойшилсныг сэтгүүлчдэд мэдэгдсэн юм.
Тиймээс бид ШШГЕГ-ын дарга М.Ганхүүтэй холбогдож, АМГ-ын дарга асан Д.Батхуяг өлсгөлөн зарласан эсэхийг тодруулахад, “Манайд өлсгөлөн зарлах тухайгаа албан ёсоор мэдэгдээгүй” хэмээн товчхон хариулт өгөв.
Авлигатай тэмцэх газрынхан Д.Батхуягийг АМГ-ын даргаар ажиллаж байхдаа албан тушаалаа хэтрүүлэн ашиглаж, аж ахуйн нэгж, байгууллагуудад ашигт малтмал олборлох, ашиглах, хайгуул хийх тусгай зөвшөөрөл хууль бусаар олгосон гэж буруутган одоогоос хоёр сарын өмнө баривчилж, Төв аймаг дахь Цагдан хорих төвд хорьсон билээ. Гэхдээ түүнийг Улаанбаатар хот дахь ШШГЕГ-ын харьяа урьдчилан хорих 461 дүгээр анги руу шилжүүлснийг эх сурвалж хэлэв.