СЕХ-ны дарга Н.Лувсанжав Монгол Улсын Ерөнхийлөгч Ц.Элбэгдоржид сонгуулийн дүнг танилцууллаа. 76 нэр дэвшигчээс 72-ыг нь СЕХ-ноос албан ёсоор танилцуулсан байна. Энэ талаар СЕХ-ны дарга Н.Лувсанжаваас тодрууллаа.
-Нэр дэвшигчдийн нэрсийг Ерөнхийлөгчид танилцууллаа. Ямар нэгэн маргаантай зүйл гарав уу?
-СЕХ  2012 сонгуулийн дүнг нэгтгэж Ерөнхийлөгчид айлтгалаа. 72 нэр дэвшигчийн нэрийг айлтгасан. УИХ-ын сонгуулийн 22, 26 дугаар тойрогт сонгогчдын 28 хувиас дээш санал авч чадаагүй учир тус бүр нэг мандат хоосон үлдэж байна. Үүнд дахин санал хураалт явуулна. Санал хураалтыг наадмаас өмнө буюу энэ сарын 8-нд явуулахаар товлосон боловч техник хэрэгслээс эхлээд бэлтгэл ажил хийгдэж байна. Тиймээс намар явуулна.
-Увсад нэр дэвшсэн Ч.Хүрэлбаатар, Б.Чойжилсүрэн нарыг түдгэлзүүлсэн гэсэн. Гэвч Ерөнхийлөгчид танилцууллаа. Ямар учраас танилцуулав?
-Увс аймагт нэр дэвшигчдийг эрүүгийн хэрэг үүсгэн шалгаж байгаа юм билээ. СЕХ өчигдөр хуралдаад албан ёсоор шүүхийн шийдвэр гараагүй учир түдгэлзүүлээгүй байна. Нэгэнт шүүхийн шийдвэр гараагүй учир өргөн барихаас өөр аргагүй.
-Өвөрхангайд дэвшсэн хүмүүсийн нэрсийг танилцуулаагүйн учир юу байна вэ?
-Өвөрхангайд МАН-аас дэвшсэн Чинзориг, Төмөрхүү нарыг шүүхээс гэм буруутай гэж үзсэн. Тиймээс үүнийг тойргийн хороонд нь шилжүүлнэ.
-Тангараг өргөсний дараа шүүхээс гэм буруутай гэдгийг тогтоовол яах вэ?
УИХ-ын тухай хуулиар л шийднэ. УИХ-ын гишүүнийг эргүүлэн татах тухай хуулийн заалт бий шүү дээ. Түүний дагуу л шийднэ.
-Дахин санал хураалтыг намар явуулна гэлээ. Хуульд заасан хугацаа байхгүй хэрэг үү?
-Хуульд тодорхой хугацаа байхгүй. Хэрэв тойрогт дэвшсэн санал хураалт хүчингүйд тооцвол долоо хоногийн дотор санал хураалт зарлах ёстой. Энэ бол хүчингүй болсон санал хураалт биш. Энэ асуудал автоматжуулалт шийдэгдэж байгаа. Автоматжуулалтыг шийдэх асуудлыг СЕХ шийдээд тойргийн хороонд шийдээ өгнө. Үүний дагуу тойргийн хороо тов гаргах ёстой.