Монгол Улсын Засгийн газрын хуралдаанаар 2012-2017 оны хөрөнгө оруулалтын хөтөлбөр баталсан. Уг хөтөлбөрт Монгол Улсын нутаг дэвсгэрт хувийн болон улсын хөрөнгө оруулалтаар гурван ч газарт цөмийн хог хаягдал булшлах байгууламж барих талаар тусгажээ. Үүнийг эсэргүүцэн “Монголын ногоон”, “Миний Монголын газар шороо” хөдөлгөөн, “Монголын Ардчилсан холбоо”, “Баян шарга” ТББ, Монголын байгаль орчны иргэний зөвлөл, “Цөмийн хөдөлгөөнийг зогсооё” ТББ-аас хэвлэлийн бага хурал хийлээ. Хэвлэлийн хурал зохион байгуулж буй ТББ, хөдөлгөөний удирдлагууд “Монгол Улсын Засгийн газар, Ерөнхий сайд С.Батболд, ЭБЭХ-ний сайд Д.Зоригт, Гадаад хэргийн сайд Г.Занданшатар нар цөмийн хог хаягдал булшлах тухай гадаад улс орнуудтай ямар ч гэрээ хэлэлцээр хийгээгүй гэж мэдэгдэж байсан нь худал байсныг өчигдрийн Засгийн газрын хуралдаанаар шийдэгдсэн дээрх асуудал нотолж байна” гэв.   Мөн Дорноговийн Даланжаргалан, Дорнодын Мардай, Алдартолгойд цөмийн хаягдал булшлах шийдвэрээ УИХ-аар батлуулахын тулд ийнхүү шинэ гишүүдийг ажилд нь оруулахгүй бойкотолж байна хэмээн мэдэгдлээ. Дээрх газруудад цөмийн хог хаягдал хадгалах, булшлах, байгууламж барих зорилгоор 60 шахам тэрбум төгрөгийг хөрөнгө оруулалтын хөтөлбөрт тусгасан юм байна.