Засаг төр солигдож Төрийн ордон хөл хөдөлгөөн ихтэй байна. Улиран сонгогдсон УИХ-ын гишүүдийн ихэнх нь хуучин өрөөндөө үлдэж. Ингэхдээ зарим нэг гишүүн нь өрөөгөө томруулжээ. Цэргийн ангид хал цэргүүд шинэковуудыг бодвол арай илүү эрх мэдэлтэй байдаг даа. Тэгвэл УИХ-ын гишүүдийн дунд ч гэсэн шинэ, хуучны ялгаа байна аа.
Шинээр сонгогдож буй гишүүдийн хувьд жижиг өрөөнд орно. Харин улиран сонгогдсон гишүүд жижиг өрөөнөөс том руу шилждэг жишиг манай парламентад бий. Жишээ нь, С.Эрдэнэ гишүүн өнгөрсөн дөрвөн жил хоёр давхарт жижигхэн өрөөнд суудаг байсан бол өнөө жил Л.Гүндалай гишүүний сууж байсан өрөө рүү нүүхээр зэхэж байна. Ц.Даваасүрэн гишүүн ч мөн ялгаагүй том өрөөнд тохитойхон сууж байна билээ. Харин Ж.Батзандан гишүүн сүүхээтэй юү, хэл ам гаргасан уу нэг давхарт байрлах том өрөөг эзэгнээд авч. Энэ мэтээр эрхэм түшээд албан өрөөгөө шилж сонгон, ая таваа хангасаар байна.