МАН-аас Ерөнхийлөгчийн сонгуульд нэр дэвшигч Миеэгомбын Энхболдыг 60 гаруй иргэний нийгмийн байгууллага, улс төрийн нам дэмжиж ажиллахаа илэрхийллээ. Тэдний нэг Монголын Ногоон Намын удирдлага өнөөдөр МАН-ын удирдлагуудтай хамтран ажиллах санамж бичигт гарын үсэг зурсан юм. Монголын ногоон нам нь МАН-тай ижил үзэл баримтлалтай бөгөөд экологийн асуудлыг эдийн засагтай уялдуулах үндсэн бодлогыг хэрэгжүүлдэг гэдгээрээ онцлог.
Монголын Ногоон Намын дарга О.Бум-Ялагч: “Манай нам 2013 оноос хойш МАН-ыг дэмжин ажиллаж байна. Бид ижил чиг баримжаатай улс төрийн намууд учраас хамтын ажиллагаа маань өргөн хүрээг хамрах боломжтой. Мөн МАН-аас намуудын удирдлага төдийгүй намын анхан шатны байгууллагуудаас хамтын ажиллагаагаа эхлүүлж байгаад баяртай байна” гэлээ.
Харин МАН-ын ЕНБД Д.Амарбаясгалан “Биднийг дэмжин ажилалаахаар энд ирсэн та бүхэнд баярлалаа. Энэ цаг үед улс төрийн олон намууд нэгдэж нэг бодологын төлөө хамтран ажиллах нь чухал болоод байна. МАН илүү бодлогын өрсөлдөөнтэй сонгууль болгохын төлөө эрмэлзэн ажиллаж байна. Үүнийг дэмжин нэг зүгт хамтдаа зүтгэнэ гэж итгэж байна” гэсэн юм.
Улс төрийн намын төлөөлүүд улс орныг нэгдсэн бодлогоор удирдаж эдийн засгийн хүндрэлээс гарах нь чухал гэдгийг онцолж байлаа. Мөн эдийн засгаа хөгжүүлэх, байгаль экологийн тэнцвэрийг хамгаалах нь хамтын ажиллагааны чухал хэсэг гэдэгтэй санал нийлж байна.
