Намын тогтолцоот улс болсноос хойш төр засгийн эрх мэдлийг гартаа төвлөрүүлж ирсэн МАН ээлжит сонгуульд ялагдал хүлээсэн. Тиймээс энэхүү ялагдлынхаа буруутныг тус намынхан хайж байна. Ийм зүйл болс­ны бурууг намын дарга С.Батболд, генсек У.Хүрэлсүх нар үүрч, хариуцлагаа ухам­сар­лан, ажлаа өгөх хү­сэлтээ илэрхийлж, намын­хаа Бага хурлыг товлон, хуралдуулахаар зар түгээсэн. МАН-ын Бага хурлаар ярилцах эхний сэдэв бол на­мын дарга, ерөнхий на­рийн бичгийн дарга нарт хариуцлага тооцох юм.

Гэвч нэгэнт намын нэр барьж явсаар УИХ-д суу­чихсан хүмүүс намын дар­га, генсекийн албан тушаалаас буух нь шийтгэл болж чадахгүй. Ёстой нөгөө “дэвшин зайлна” гэдэг л болж байх шиг. Зорилгоо биелүүлсэн учир баяр­­тай гээд л явах биз. Тэр тусмаа У.Хүрэлсүхэд ха­риуцлага тооцож чадахгүй. Тэртээ, тэргүй УИХ-ын гишүүн болчихсон хүн намын ерөнхий нарийн бичгийн дарга хийж болдоггүй хуультай. Яахав, Бага хурал дээрээ зэмлэсэн л болох байх. Үүнээс өөр хийж чадах зүйл алга.

Дүрэм журмын дагуу л ажлаа хүлээлгэн өгч байгаатай адил. Нөгөө хариуцлагаа хар толгойгоороо хүлээж буй нь энэ гэж тайлбарлавал ха­рамсалтай л юм. Ерөнхийдөө түүний хувьд хариуцлагаа хүлээнэ гэсэн үг нь албан тушаалаа ахиулж дэвшүүлнэ гэдэгтэй утга дүйж байна. Эсвэл хариуцлага гэдэг үг МАН-ын бага хуралд ийм зөө­лөн утгатай үг болон буух нь. Нөгөө үлгэр жишээ яасан бэ, эрхэм У.Хүрэлсүх гишүүн ээ.

МАН-ын бага хурлын дараагийн сэдэв бол шинэчлэл. Сонгуульд ялагдсан даруйдаа л МАН шинэчлэлийн тухай дахин ярив. Саяхан л МАХН нэрээ МАН болгон сольж, намын батлахаа өөрчилснөө шинэчлэл хэмээн ярьж байсан. Харин энэ удаад намын дарга, генсекээ солиод л шинэчлэгдлээ хэмээн үзэх бололтой. МАН эсвэл хэтэрхий хуучирчихаад шинэчлэл гэдэг зүйлийг ойлгохоосоо нэгэнт өнгөрчихсөн юм болов уу. Энэ шинэчлэлүүд нэг л биш ээ.

МАН-ын 40 дүгээр Бага хурлын оргил хэсэг нь мэдээж, С.Батболд, У.Хүрэлсүх нарын орыг хэн залгах вэ гэдэг асуудал. Намын шинэхэн даргыг ярьж эхлэхтэй зэрэгцэн МАН-д жигүүр “ургаж”, мөн оны ялгаа хүчээ авч байна гэнэ. Ө.Энхтүвшин, М.Энхболд, Д.Лүндээжанцан, С.Дэмбэрэл нарыг намтайгаа хамт “хөгширчихсөн” хэмээн залуучууд нь ад шоо үзэх болж гэнэ. Харин луугарууд “Тар нар болоогүй ээ. Аз нь таараад гараад ирсэн ч бидний хүүхэлдэй мэт ажилла” гээд “хав дараад” явуулдаггүй бололтой юм. Өнөөдөр болох МАН-ын Бага хурал дээр луугарууд голцуу багтсан УИХ дахь намын бүлгээс нь Ө.Энхтүвшинг намын даргад нэр дэвшүүлэхээр бэлдсэн бол залуучууд харин Ж.Энхбаярыг хүчтэй хөгжөөн дэмжиж байгаа сурагтай. Ахмадууд Ө.Энхтүвшинг намын даргад сойсноо шинэчлэл хэмээн үзэж байгаа бол залуучууд нь харин үүний эсрэг дуугарч байгаа бололтой. Гэвч залуусын фракц хэр хууччуулын эсрэг хүчрэх эсэх нь даан ч эргэлзээтэй.
Харин намын генсекийн суудалд олон хүн яригдаж байна. Дүрмэндээ бол намын дарга сонгогдсоны дараа ерөнхий нарийн бичгийн даргаа дэвшүүлдэг. Тэгэхээр намын даргаар хэн томилогдохоос шалтгаалаад генсекийн таавар өөрчлөгдөнө. Г.Занданшатар, Л.Оюун-Эрдэнэ гээд л нэлээд урт цуваа дуулдаж байна.

Үүнийг орвонгоор нь эргүүлж магадгүй нэгэн таамаг ч гарчээ. С.Баяр намдаа эргэн ирэх гэнэ. Хэрэв С.Баяр ирж, магадгүй намын даргад өрсөлдвөл Ө.Энхтүвшин ч, Ж.Энхбаяр ч сураггүй “арчигдах” биз. Бүр цаашилбал, С.Баяр намын дарга болсон даруйдаа Ерөнхийлөгчийн сонгуулийг эхлүүлэх биз. Хэрэв сүүлчийн таамаг үнэн бол МАН-д тэсрэлт болох нь гарцаагүй аж. Товчхондоо тэднээс хуучны дүр төрхөөрөө шинэчлэл хийх дүр зураг харагдах болов уу.      
  
Ийнхүү таамаглалууд хөврөхтэй зэрэгцэн МАН-ын удирдах зөвлөл бүрэлдэхүүнээрээ огцрох болсноо мэдэгдлээ. Үүнээс үзвэл, МАН-ын удирдах зөвлөлд дандаа УИХ-ын гишүүд багтдаг юм байна. Бас л намын жагсаалтаар парламентын босгыг давсан нь цөөнгүй юм билээ. Нэгэнтээ л УИХ-ын гишүүн болоод намд ажилласан шангаа хүртчихсэн хүмүүс одоо огцроод яах ч юм билээ. Дэвшээд нисчих шахаж яваа хүмүүст намын аппаратаас огцорсон нь хариуцлага тооцсон явдал болж чадахгүй.

Хэдийгээр хүндээ хариуцлага тооцож чадаагүй ч, МАН энэ Бага хурлаараа ялагдлаа хүлээлээ. Гэхдээ зөвхөн нам дотроо. Одоо тэдэнд ард түмний өмнө ялагдлаа хүлээх үлдлээ. Одоо тахимаа өгч, чуулганаа эхлүүлчих. Нэгэнт цагаан тугаа өргөчихсөн юм чинь.